ന്യൂഡല്ഹി: രണ്ടാം മോദി സര്ക്കാരിനെതിരെ പ്രതിപക്ഷം ലോക്സഭയില് കൊണ്ടുവന്ന അവിശ്വാസപ്രമേയത്തെ എതിര്ത്ത് കേന്ദ്ര ആഭ്യന്തരമന്ത്രി അമിത് ഷാ. കള്ളങ്ങള് നിറച്ചതാണ് അവിശ്വാസ പ്രമേയമെന്ന് അമിത് ഷാ ലോക്സഭയില് പറഞ്ഞു. പ്രതിപക്ഷം യഥാര്ഥ പ്രശ്നങ്ങളല്ല ഉയര്ത്തുന്നത്. അവിശ്വാസ പ്രമേയം ജനങ്ങളെ തെറ്റിദ്ധരിപ്പിക്കാനാണെന്നും അദ്ദേഹം പറഞ്ഞു.ഈ അവിശ്വാസ പ്രമേയം രാജ്യത്തെ പ്രതിപക്ഷത്തിന്റെ യഥാര്ഥ സ്വഭാവം കാണിക്കും. രാജ്യത്തെ ജനങ്ങള് എല്ലാം വീക്ഷിക്കുകയാണെന്നും അദ്ദേഹം പറഞ്ഞു.സ്വാതന്ത്ര്യത്തിനുശേഷം ഏറ്റവും ജനപ്രീതിയുള്ള പ്രധാനമന്ത്രി ഉണ്ടെങ്കില് അത് നരേന്ദ്ര മോദിയാണ്. താന് ഇത് പറയുന്നില്ല. ലോകമെമ്പാടുമുള്ള നിരവധി സര്വേകള് അങ്ങനെ പറയുന്നു. ഒരു ദിവസം പോലും അവധി എടുക്കാതെ 24ല് 17 മണിക്കൂറും ജോലി ചെയ്യുന്ന ഒരു പ്രധാനമന്ത്രിയുണ്ടെങ്കില്, സ്വാതന്ത്ര്യത്തിനു ശേഷം അത് നരേന്ദ്ര മോദിയാണെന്നും അമിത് ഷാ ലോക്സഭയില് പറഞ്ഞു.
നരേന്ദ്ര മോദി അഴിമതിയും രാജവംശ രാഷ്ട്രീയവും പ്രീണനവും ഇല്ലാതാക്കി. രാഷ്ട്രീയത്തിന് പ്രാധാന്യം നല്കി. കര്ഷകരുടെ കടങ്ങള് എഴുതിത്തള്ളുമെന്ന് അവര് (യുപിഎ) പറഞ്ഞുകൊണ്ടേയിരിക്കുന്നു. കടം എഴുതിത്തള്ളുന്നതില് ഞങ്ങള് വിശ്വസിക്കുന്നില്ല. മറിച്ച് ഒരാള് വായ്പയെടുക്കേണ്ടതില്ല.ഞങ്ങള് കര്ഷകര്ക്ക് നല്കിയത് ഇതാണ്,സൗജന്യങ്ങളല്ല. ഞങ്ങള് അവരെ സ്വയം പര്യാപ്തരാക്കി.കേന്ദ്രത്തില് നിന്ന് ഒരു രൂപ പാവപ്പെട്ടവര്ക്ക് അയക്കുമ്പോള് 15 പൈസ മാത്രമാണ് ഗുണഭോക്താവിലേക്ക് എത്തുന്നത് എന്ന് മുന് പ്രധാനമന്ത്രി രാജീവ് ഗാന്ധി പറഞ്ഞിരുന്നു. എന്നാല് ഇന്ന്, മുഴുവന് തുകയും ദരിദ്രരിലേക്കാണ് എത്തുന്നതെന്നും അമിത് ഷാ പറഞ്ഞു.കഴിഞ്ഞ ഒന്പത് വര്ഷത്തിനിടെ രാജ്യത്തിന്റെ സമ്പദ് വ്യവസ്ഥയെ 11-ാം റാങ്കില് നിന്ന് അഞ്ചാം റാങ്കിലേക്ക് ഉയര്ത്താന് ഞങ്ങളുടെ സര്ക്കാരിന് സാധിച്ചു. നരേന്ദ്ര മോദി വീണ്ടും രാജ്യത്തിന്റെ പ്രധാനമന്ത്രിയാകുമെന്ന് തനിക്ക് പൂര്ണ വിശ്വാസമുണ്ട്.ഞങ്ങളുടെ നയങ്ങള് കാരണം 2014 മുതല് കശ്മീരിലെ സ്ഥിതിഗതികള് മാറി. കശ്മീരിനെ ഭീകരത മുക്തമാക്കാന് ഞങ്ങള് പ്രവര്ത്തിച്ചുവെന്നും അമിത് ഷാ കൂട്ടിച്ചേര്ത്തു.