. ക്രൈംബ്രാഞ്ച് അന്വേഷിക്കും
തിരുവനന്തപുരം: സെക്രട്ടേറിയറ്റില് വ്യവസായ മന്ത്രിയുടെ ഓഫീസിന് സമീപമുണ്ടായ തീപിടിത്തം അന്വേഷിക്കാന് ക്രൈംബ്രാഞ്ചിനെ ചുമതലപ്പെടുത്തി. സംസ്ഥാന പൊലീസ് മേധാവി അനില് കാന്താണ് ഇത് സംബന്ധിച്ച ഉത്തരവിട്ടത്.മന്ത്രി പി. രാജീവിന്റെ അഡീഷണല് പ്രൈവറ്റ് സെക്രട്ടറി ജി.വിനോദിന്റെ ഓഫീസിലാണ് തീപിടിത്തമുണ്ടായത്. സംഭവത്തില് കന്റോണ്മെന്റ് പൊലീസും കേസെടുത്തിട്ടുണ്ട്. ഫയലുകളൊന്നും കത്തിനശിച്ചിട്ടില്ലെന്നും തീപിടിത്തത്തിന്റെ കാരണത്തെ കുറിച്ച് അന്വേഷിക്കുമെന്നും മന്ത്രി പ്രതികരിച്ചു.
മുഖ്യമന്ത്രിയുടെ ഓഫീസിരിക്കുന്ന നോര്ത്ത് ബ്ലോക്കിനോട് ചേര്ന്ന് സാന്റ്വിച്ച് ബ്ലോക്കിലാണ് ഇന്നലെ രാവിലെ 7.55 ഓടെ തീ കണ്ടത്. മൂന്നാംനിലയില് മന്ത്രി പി. രാജീവിന്റെ ഓഫീസിനോട് ചേര്ന്ന് അഡീഷണല് പ്രൈവറ്റ് സെക്രട്ടറിയുടെ മുറിയിലെ എസിയില് നിന്നാണ് തീ പടര്ന്നതെന്നാണ് പ്രാഥമിക നിഗമനം. ഓഫീസ് അസിസ്റ്റന്റ് എസി ഓണ് ചെയ്തതിന് പിന്നാലെയാണ് സംഭവം. എസി കത്തിപ്പോയി. കര്ട്ടനിലേക്കും സീലിംഗിലേക്കും തീപടര്ന്നു. ഓഫീസ് ഫര്ണിച്ചറുകളും കത്തിനശിച്ചു. ഫയര് ഫോഴ്സിന്റെ രണ്ട് യൂണിറ്റ് ആദ്യം സ്ഥലത്തെത്തി. 15 മിനിറ്റിനകം തന്നെ തീ പൂര്ണ്ണമായും അണച്ചു.