. ലോക്സഭാ തെരഞ്ഞെടുപ്പ്
. കോഴിക്കോട് എളമരം കരീം, മലപ്പുറത്ത് വി.വസീഫ്, വടകരയില്‍ കെ.കെ.ശൈലജ, കണ്ണൂരില്‍ എം.വി.ജയരാജന്‍
തിരുവനന്തപുരം: ലോക്സഭാ തെരഞ്ഞെടുപ്പില്‍ സി.പി.എം സ്ഥാനാര്‍ത്ഥിപട്ടികയ്ക്ക് അന്തിമ രൂപമായി. മലപ്പുറത്ത് ഡി.വൈ.എഫ്.ഐ സംസ്ഥാന പ്രസിഡന്‍റ് വി.വസീഫ് മത്സരിക്കും. പൊന്നാനിയില്‍ പൊതുസ്വതന്ത്രനായി കെ.എസ്.ഹംസ സ്ഥാനാര്‍ത്ഥിയാകും. മുസ്ലിം ലീഗ് മുന്‍ സംസ്ഥാന സെക്രട്ടറിയായിരുന്നു ഹംസ. എറണാകുളത്ത് കെ.ജെ.ഷൈന്‍ മത്സരിക്കും. കെ.എസ്.ടി.എ ഭാരവാഹിയാണ് ഷൈന്‍.
വടകരയില്‍ കേന്ദ്രകമ്മിറ്റിയംഗവും എം എല്‍ എയുമായ കെ.കെ.ശൈലജ, കണ്ണൂരില്‍ ജില്ലാ സെക്രട്ടറി എം.വി.ജയരാജന്‍, കാസര്‍കോട് ജില്ലാ സെക്രട്ടറി എം.വി. ബാലകൃഷ്ണന്‍, കോഴിക്കോട് മുന്‍മന്ത്രിയും മുന്‍ രാജ്യസഭാ എംപിയുമായ എളമരം കരീം, പാലക്കാട് പിബി അംഗം എ.വിജയരാഘവന്‍, ചാലക്കുടിയില്‍ മുന്‍ വിദ്യാഭ്യാസ മന്ത്രി സി.രവീന്ദ്രനാഥ്, ആലപ്പുഴയില്‍ എ.എം.ആരിഫ്, ഇടുക്കിയില്‍ ജോയ്സ് ജോര്‍ജ്, ആറ്റിങ്ങലില്‍ വി.ജോയ്, കൊല്ലത്ത് നടനും എം എല്‍ എ യുമായ എം.മുകേഷ്, പത്തനംതിട്ടയില്‍ മുന്‍ മന്ത്രി ടി. എം. തോമസ് ഐസക്, ആലത്തൂരില്‍ മന്ത്രി കെ.രാധാകൃഷ്ണന്‍ എന്നിവരാകും സി.പി. എം സ്ഥാനാര്‍ത്ഥികള്‍.
സംസ്ഥാന നേതൃയോഗങ്ങളിലെ തീരുമാനത്തിന് ശേഷം പാര്‍ലമെന്‍റ് മണ്ഡലം കമ്മിറ്റികളുടെ അംഗീകാരം കൂടി വാങ്ങിയ ശേഷം 27ന് സ്ഥാനാര്‍ത്ഥികളെ ഔദ്യോഗികമായി പ്രഖ്യാപിക്കും. 20 സീറ്റില്‍ 15 ഇടത്താണ് സി.പി.എം മത്സരിക്കുന്നത്ഇന്നലെ ചേര്‍ന്ന സംസ്ഥാന സെക്രട്ടറിയേറ്റ് യോഗത്തിലാണ് സ്ഥാനാര്‍ത്ഥികള്‍ ആരൊക്കെയാണെന്ന കാര്യത്തില്‍ അന്തിമതീരുമാനമായത്. സാധ്യതാ പട്ടികയിലുണ്ടായിരുന്ന ചിലരെ നിലനിര്‍ത്തിയും മറ്റു ചിലരെ ഒഴിവാക്കിയുമാണ് അന്തിമപട്ടിക.
