കൊച്ചി : രണ്ടുവര്ഷമായി സജീവമല്ലാത്ത ജിമെയില് അക്കൗണ്ടുകള് ഗൂഗിള് നീക്കം ചെയ്യുന്നു. ഡിസംബര് ഒന്നുമുതലാണ് നിഷ് ക്രിയ അക്കൗണ്ടുകള് നീക്കം ചെയ്യുകയെന്ന് ഗൂഗിള് അറിയിച്ചു. സജീവമല്ലാത്ത അക്കൗണ്ടുകള് സൈബര് കുറ്റവാളികള് ദുരുപയോഗിക്കുന്നത് തടയാനാണ് ഇവ നീക്കം ചെയ്യുന്നത്.
ജിമെയില് അക്കൗണ്ട് നീക്കം ചെയ്യുന്നതോടെ അതിനൊപ്പം ഡോക്സ്, ഡ്രൈവ്, മീറ്റ്, കലണ്ടര്, യൂട്യൂബ്, ഗൂഗിള് ഫോട്ടോസ് എന്നിവയുള്പ്പെടെയുള്ള അക്കൗണ്ടുകളിലെ ഉള്ളടക്കവും നഷ്ടമാകും.
രണ്ട് വര്ഷമായി നിങ്ങളുടെ ഏതെങ്കിലും ഗൂഗിള് അക്കൗണ്ടില് സൈന്-ഇന് ചെയ്തിട്ടില്ലെങ്കിലാണ് അവ ഡീലിറ്റ് ചെയ്യപ്പെടുക. എന്നാല് ജിമെയില്, ഡ്രൈവ്, ഡോക്സ്, ഫോട്ടോസ്, മീറ്റ്, കലണ്ടര് തുടങ്ങിയ സേവനങ്ങളില് നിന്ന് അക്കൗണ്ടും ഡാറ്റയും ഇല്ലാതാക്കുന്നതിന് മുമ്പ്, നിങ്ങളുടെ അതേ ഇ-മെയില് ഐഡിയിലേക്കും ബാക്കപ്പ് ഇമെയില് വിലാസത്തിലേക്കും വിവിധ ഘട്ടങ്ങളിലായി ഗൂഗിള് ഇമെയിലുകള് അയക്കും.
രണ്ട് വര്ഷത്തിലൊരിക്കലെങ്കിലും അക്കൗണ്ട് ലോഗിന് ചെയ്യുക എന്നതാണ് അക്കൗണ്ട് നിലനിര്ത്താന് വേണ്ടത്. ഗൂഗിള് ഡ്രൈവ് ഉപയോഗിക്കുകയോ, യൂട്യൂബില് വിഡിയോ സെര്ച്ച് ചെയ്യുകയോ കാണുകയോ ചെയ്താലും മതി.ഒരു നിഷ്ക്രിയ അക്കൗണ്ട് നീക്കം ചെയ്താല് പിന്നീട് പുതിയ ഗൂഗിള് അക്കൗണ്ട് എടുക്കുമ്പോള് പഴയ അക്കൗണ്ടിന്റെ ജിമെയില് വിലാസം വീണ്ടും ഉപയോഗിക്കാന് കഴിയില്ലെന്ന് ഗൂഗില് വ്യക്തമാക്കി
ഉപയോക്താക്കള്ക്ക് അവരുടെ അക്കൗണ്ടുകള് സജീവമായി നിലനിര്ത്താന് സഹായിക്കുന്ന ചില ലളിതമായ മാര്ഗ്ഗങ്ങള് ഗൂഗിള് വ്യക്തമാക്കുന്നു
ഇ-മെയില് വായിക്കുകയോ അയയ്ക്കുകയോ ചെയ്യുക, ഗൂഗിള് ഡ്രൈവ് ഉപയോഗിക്കുക, യുട്യൂബ് വീഡിയോ കാണുക, ഫോട്ടോഷെയര് ചെയ്യുക, ആപ്പ് ഡൗണ്ലോഡ് ചെയ്യുക, ഗൂഗിള് സെര്ച്ച് ഉപയോഗിക്കുക , മറ്റ് സേവനങ്ങള്ക്കായി സൈന് ഇന് ചെയ്യാന് ഗൂഗിള് ഉപയോഗിച്ച് സൈന് ഇന് ചെയ്യുക എന്നിങ്ങനെ അക്കൗണ്ട് സജീവമാക്കാം.