ചെന്നൈ: പ്രശസ്ത സംവിധായകന് കെ.എസ്.സേതുമാധവന് (94) അന്തരിച്ചു. ചെന്നൈയിലായിരുന്നു അന്ത്യം.
കമല്ഹാസന് ബാലതാരമായി അഭിനയിച്ച ‘കണ്ണും കരളും’ ആണ് ആദ്യ മലയാള സിനിമ.
മലയാളത്തില് ഏറ്റവുമധികം സാഹിത്യകൃതികള് സിനിമയാക്കിയ സംവിധായകനാണ്. ഓപ്പോള്, ചട്ടക്കാരി, അരനാഴിക നേരം, ഓടയില് നിന്ന്, അടിമകള്, അച്ഛനും ബാപ്പയും, കരകാണാക്കടല്, പണി തീരാത്ത വീട് തുടങ്ങിയവയാണ് പ്രധാന ചിത്രങ്ങള്. മലയാളത്തിന് പുറമേ ഹിന്ദി, തമിഴ്, തെലുങ്ക് എന്നീ ഭാഷകളിലും സിനിമകള് സംവിധാനം ചെയ്തു.
നിരവധി തവണ ദേശീയ ചലച്ചിത്ര പുരസ്കാരവും സംസ്ഥാന ചലച്ചിത്ര പുരസ്കാരവും നേടിയിട്ടുണ്ട്. ചലച്ചിത്ര ലോകത്ത് നല്കിയ സമഗ്രസംഭാവനകളെ പരിഗണിച്ച് 2009ല് ജെ.സി.ഡാനിയേല് പുരസ്കാരം നല്കി ആദരിച്ചു.
പാലക്കാട് സുബ്രഹ്മണ്യംലക്ഷ്മി ദമ്പതികളുടെ മകനായി 1931ല് സേതുമാധവന് ജനിച്ചു. മൂന്നു സഹോദരിമാരും ഒരു സഹോദരനുമുണ്ട്.
തമിഴ്നാട്ടിലെ വടക്കേ ആര്ക്കോട്ടിലും പാലക്കാട്ടുമായിരുന്നു ബാല്യം. പാലക്കാട് വികോടോറിയ കോളേജില് നിന്നും സസ്യശാസ്ത്രത്തില് ബിരുദം നേടി.
സംവിധായകന് കെ.രാംനാഥിന്റെ സഹായിയായിട്ടാണ് സിനിമയില് എത്തിയത്. എല്.വി. പ്രസാദ്, എ .എസ്.എ. സ്വാമി, സുന്ദര് റാവു, നന്ദകര്ണി എന്നീ സംവിധായകരുടെ കൂടെ നിന്ന് സംവിധാനം പഠിച്ചു. 1960ല് വീരവിജയ എന്ന സിംഹള ചിത്രത്തിലൂടെ സ്വതന്ത്ര സംവിധായകനായി.
