ന്യൂഡെല്ഹി: രാജ്യത്ത് വിവിധ സംസ്ഥാനങ്ങളില് കോവിഡ് ലോക്ഡൗണ് മൂലം അടച്ചിട്ട സ്കൂളുകളൂം കോളജുകളും ഘട്ടം ഘട്ടമായി തുറന്നു. ന്യൂഡെല്ഹി, രാജസ്താന്, ഉത്തര്പ്രദേശ്, മധ്യപ്രദേശ്, തമിഴ്നാട് എന്നിവിടങ്ങളിലാണ് സ്കൂളുകള് തുറന്നത്.ഉത്തര്പ്രദേശില് ഒന്നുമുതല് അഞ്ചുവരെയുള്ള ക്ലാസുകളും മധ്യപ്രദേശില് ആറു മുതല് 12 വരെയുള്ള ക്ലാസുകളുമാണ് തുറന്നത്.
സ്കൂളിലെ 50 ശതമാനം വിദ്യാര്ഥികള്ക്ക് മാത്രമേ പ്രവേശനം അനുവദിക്കു. മാതാപിതാക്കളുടെ സമ്മതപത്രം കൊണ്ടായിരിക്കണം വിദ്യാര്ഥികള് സ്കൂളിലേക്ക് വരേണ്ടത്. ഓഫ്ലൈന് ക്ലാസുകളില് പങ്കെടുക്കണമെന്ന് യാതൊരു നിര്ബന്ധവുമില്ലെന്നും ഓണ്ലൈന് ക്ലാസുകള് തുടരുമെന്നും സര്കാര് അറിയിച്ചു. സ്കൂളുകളുടെ പ്രവര്ത്തനങ്ങള്ക്കായി പ്രത്യേക മാര്ഗനിര്ദേശങ്ങളും സര്കാര് പുറപ്പെടുവിച്ചിട്ടുണ്ട്. രാജസ്താനില് ആദ്യഘട്ടമായി ഒമ്പത് മുതല് 12 വരെയുള്ള ക്ലാസുകളും കോളജുകളുമാണ് ആരംഭിക്കുന്നത്.
തമിഴ്നാട്ടില് 9 മുതല് 12 വരെയുള്ള ക്ലാസുകളും കോളജുകളും മാത്രമാണ് തുടങ്ങുന്നത്. ഒരു ക്ലാസില് 20 കുട്ടികള് എന്ന നിലയില് ഷിഫ്റ്റ് അടിസ്ഥാനത്തില് ക്ലാസുകള് നടത്താനാണ് സര്കാര് നിര്ദേശം. കോവിഡ് സുരക്ഷാ മാനദണ്ഡങ്ങള് പാലിക്കാനുള്ള നിര്ദേശങ്ങള് സ്കൂളുകള്ക്ക് നല്കിയിട്ടുണ്ട്. സ്കൂള് കുട്ടികള്ക്ക് ബസ് യാത്ര സൗജന്യമാക്കി സര്കാര് ഉത്തരവിറക്കിയിരുന്നു. കോളജുകളിലും ഷിഫ്റ്റ് അടിസ്ഥാനത്തിലായിരിക്കും ക്ലാസ്.
