കോഴിക്കോട്: കട്ടിപ്പാറ പഞ്ചായത്തിലെ കരിഞ്ചോല മലയില് വന് വാറ്റ് കേന്ദ്രം എക്സൈസ് തകര്ത്തു. ക്രിസ്മസ് ന്യൂ ഇയര് സ്പെഷ്യല് ഡ്രൈവിന്റെ ഭാഗമായി താമരശ്ശേരി എക്സൈസ് സര്ക്കിള് പാര്ട്ടി കരിഞ്ചോല ഭാഗത്ത് വ്യാപകമായ റെയ്ഡ് നടത്തുകയായിരുന്നു. കരിഞ്ചോല മലയില് നിന്നും 210 ലിറ്ററിന്റെ രണ്ടു ബാരലുകളിലും 500 ലിറ്ററിന്റെ ഒരു ടാങ്കിലുമായി 920 ലിറ്റര് വാഷും രണ്ട് കൂട്ടം വാറ്റ് സെറ്റും രണ്ട് ഗ്യാസ് സിലിണ്ടറുകളും രണ്ട് ഗ്യാസ് അടുപ്പുകളും 10 ലിറ്റര് ചാരായവും എക്സൈസ് കണ്ടുപിടിച്ചു.
സാമ്പിള് ശേഖരിച്ച ശേഷം വാഷ് ഒഴുക്കി നശിപ്പിച്ചു. അസിസ്റ്റന്റ് എക്സൈസ് ഇന്സ്പെക്ടര് സി. സന്തോഷ് കുമാറിന്റെ നേതൃത്വത്തില് നടന്നറെയ്ഡില് പ്രിവന്റീവ് ഓഫീസര് അബ്ദുള്ള, സിവില് എക്സൈസ് ഓഫീസര്മാരായ നിഷാന്ത്, ബിനീഷ് കുമാര്, ഡ്രൈവര് ശ്രീജിത്ത് എന്നിവര് പങ്കെടുത്തു. കഴിഞ്ഞ ദിവസവും കരിഞ്ചോല ഭാഗത്ത് നടത്തിയ റെയ്ഡില് എണ്ണൂറോളം ലിറ്റര് വാഷ് കണ്ടെടുത്ത് കേസ് രജിസ്റ്റര് ചെയ്തിരുന്നു. കുന്നിന് മുകളില് പയര് വള്ളികള്ക്കിടയില് ആയിരുന്നു വാഷ് ഒളിപ്പിച്ചു വെച്ചിരുന്നത്. ഈ വന പ്രദേശത്ത് പലയിടങ്ങളിലായി വ്യാപകമായി വ്യാജവാറ്റ് നടക്കുന്നത് പതിവാകുകയാണ്.