കോഴിക്കോട്: സംസ്ഥാനത്ത് കോണ്ഗ്രസിന്റെയും യുഡിഎഫിന്റെയും ശക്തമായ തിരിച്ചുവരവിന് വിവിധ കര്മപരിപാടികള് ആവിഷ്കരിച്ചു ചിന്തന് ശിബിരം സമാപിച്ചു. ഇടതുമുന്നണിയില് അതൃപ്തരായി തുടരുന്ന കക്ഷികളെ യുഡിഎഫിലെത്തിക്കാന് നീക്കം നടത്തും . ബൂത്ത് തലം മുതല് കോണ്ഗ്രസില് പുനസംഘടന ഉടന് പൂര്ത്തിയാക്കും. ന്യൂനപക്ഷ-പിന്നോക്ക വിഭാഗങ്ങള്ക്കിടയില് പാര്ട്ടിയുടെ സാന്നിധ്യംഉറപ്പാക്കാന് പ്രവര്ത്തന പരിപാടികള് ആവിഷ്കരിക്കും.
വരുന്ന ലോക്സഭാ തെരഞ്ഞെടുപ്പില് കേരളത്തിലെ മുഴുവന് സീറ്റുകളിലും വിജയം നേടുകയാണ് ലക്ഷ്യമെന്നും കെപിസിസി പ്രസിഡന്റ് കെ. സുധാകരന് നടത്തിയ ചിന്തന് ശിബിരത്തിലെ നയ പ്രഖ്യാപനത്തില് പറയുന്നു.അഞ്ച് സെഷനുകളിലായി രണ്ട് ദിവസം നീണ്ട ചര്ച്ചകള്ക്കൊടുവിലാണ് കോണ്ഗ്രസിന്റെ ശക്തമായ തിരിച്ചുവരവിന് കളമൊരുക്കാന് ലക്ഷ്യമിട്ടുളള ചിന്തന് ശിബിരം പ്രഖ്യാപനം. പാര്ട്ടി പുനസംഘടന, മുന്നണി വിപുലീകരണം, പാര്ട്ടിയുമായി അകന്ന വിവിധ വിഭാഗങ്ങളുടെ പിന്തുണ ഉറപ്പാക്കല് തുടങ്ങി സമയ ബന്ധിതവും പ്രായോഗികവുമായ കര്മ പദ്ധതിയാണ് ചിന്തന് ശിബിരം പ്രഖ്യാപനമെന്ന നിലയില് കെ. സുധാകരന് അവതരിപ്പിച്ചത്. മുന്നണി വിട്ട ജോസ് കെ. മാണിയുടെ നേതൃത്വത്തിലുളള കേരള കോണ്ഗ്രസ്, എല്ജെഡി എന്നീ കക്ഷികളെ തിരികെ കൊണ്ടുവരണമെന്നായിരുന്നു വി. കെ ശ്രീകണ്ഠന് എം.പി അധ്യക്ഷനായ രാഷ്ട്രീയ കാര്യ കമ്മിറ്റി മുന്നോട്ടുവച്ച നിര്ദ്ദേശം. ക്രിസ്ത്യന് വിഭാഗങ്ങള്ക്കിടയില് കടന്നു കയറാനുള്ള ബിജെപി ശ്രമത്തിന് തടയിടണമെന്നും നിര്ദ്ദേശത്തിലുണ്ട്.
അഞ്ച് സെഷനുകളിലായി നടന്ന ചര്ച്ചകളില് മിഷന് 2024 എന്ന പേരില് ലോക്സഭാ തെരഞ്ഞെടുപ്പ് കേന്ദ്രീകരിച്ചുളള ചര്ച്ചകള്ക്കായിരുന്നു ഊന്നല്. ലോക്സഭാ തെരഞ്ഞെടുപ്പിന് ആറു മാസം മുന്പ് തെരഞ്ഞെടുപ്പ് പ്രവര്ത്തനങ്ങള്ക്ക് മാത്രമായി പ്രത്യേക കമ്മിറ്റി നിലവില് വരും. എഐസിസി നിഷ്കകര്ഷിക്കുന്ന സമയക്രമം വച്ച് പാര്ട്ടി പുനസംഘടന പൂര്ത്തിയാക്കും.
രാഷ്ട്രീയ കാര്യസമിതിയുടെ മാതൃകയില് ജില്ലകളിലും നിയോജക മണ്ഡലങ്ങളിലും സമിതികള് വരും. പാര്ട്ടിയില് അച്ചടക്കം ഉറപ്പുവരുത്താന് ജില്ലാ തലത്തില് സമിതി രൂപീകരിക്കും. പാര്ട്ടി സമരങ്ങള് പരിഷ്കരിക്കും.യുവാക്കള്ക്കും വനിതകള്ക്കും എല്ലാ ഘടകങ്ങളിലും അവസരം ഉറപ്പാക്കും. ബൂത്ത് തലങ്ങളില് മുഴുവന് സമയ പ്രവര്ത്തരെ ഉറപ്പാക്കും. ഇക്കാര്യങ്ങള്ക്കായി ആറ് മാസം നീളുന്ന വിപുലമായ പരിശീലന പരിപാടികള് സംഘടിപ്പിക്കും. കെ എസ് യു പുനസംഘടന രണ്ടാഴ്ചയ്ക്കകം നടത്താനും ചിന്തന് ശിബിരില് ധാരണയായി.
