കൊച്ചി: സിഎംആര്എല് എക്സാലോജിക് മാസപ്പടിക്കേസില് മുഖ്യമന്ത്രി പിണറായി വിജയനും മകള് വീണാ വിജയനും ഹൈക്കോടതി നോട്ടീസ്. മാത്യു കുഴല്നാടന് എം എല് എ യുടെ റിവിഷന് ഹര്ജിയിലാണ് കോടതി ഇരുവര്ക്കും നോട്ടീസ് അയച്ചിരിക്കുന്നത്. സി.എം.ആര്.എല്. അടക്കമുള്ള എല്ലാ എതിര്കക്ഷികള്ക്കും നോട്ടീസ് അയച്ചിട്ടുണ്ട്.
മാസപ്പടി വിവാദത്തില് വിജിലന്സ് കോടതി വിധിക്കെതിരെ മാത്യു കുഴല്നാടന് ഹൈക്കോടതിയെ സമീപിച്ചിരുന്നു. മുഖ്യമന്ത്രിക്കും വീണയ്ക്കുമെതിരെ വിജിലന്സ് അന്വേഷണം ആവശ്യപ്പെട്ട് നല്കിയ ഹര്ജി തള്ളിയതിനെ തുടര്ന്നായിരുന്നു ഇത്. ആരോപണം തെളിയിക്കുന്ന രേഖകള് ഹാജരാക്കുന്നതില് പരാതിക്കാരന് പരാജയപ്പെട്ടുവെന്നുമായിരുന്നു ഹര്ജി തള്ളിക്കൊണ്ട് വിജിലന്സ് കോടതിയുടെ വിധിയില് പ്രസ്താവിച്ചത്. ആരോപണങ്ങള്ക്ക് പ്രഥമദൃഷ്ട്യാ തെളിവില്ലെന്നും ഹര്ജി അഴിമതി നിരോധന നിയമത്തിന്റെ പരിധിയില് വരില്ലെന്നും വിധിന്യായത്തില് പറഞ്ഞിരുന്നു. മാത്യു കുഴല്നാടന്റെ ഹര്ജി രാഷ്ട്രീയ പ്രേരിതമായ ആരോപണം എന്ന വാദം ശക്തിപ്പെടുത്തുന്നതാണെന്നും കോടതി വിമര്ശിച്ചിരുന്നു. വിജിലന്സ് കോടതിയുടെ ഈ നിരീക്ഷണം പുനഃപരിശോധിക്കുന്നതിന് നിര്ദ്ദേശം നല്കണമെന്നാവശ്യപ്പെട്ടാണ് മാത്യു കുഴല്നാടന് ഹൈക്കോടതിയെ സമീപിച്ചത്. ഇതിലാണ് ഹൈക്കോടതി നോട്ടീസ് അയച്ചിരിക്കുന്നത്.