തിരുവനന്തപുരം: പാലിന്‍റെ വില ലിറ്ററിന് ആറ് രൂപ കൂട്ടാന്‍ മന്ത്രിസഭ അനുമതി നല്‍കിയതിന് പിന്നാലെ ഡിസംബര്‍ ഒന്ന് മുതല്‍ പുതിയ നിരക്ക് പ്രാബല്യത്തില്‍ വരുമെന്ന് മില്‍മ അറിയിച്ചു.
ലിറ്ററിന് അഞ്ച് രൂപ വീതം കര്‍ഷകര്‍ക്ക് കൂടുതലായി ലഭിക്കും. പാലിനൊപ്പം തൈര്, നെയ്യ് ഉള്‍പ്പെടെ മറ്റ് ഉത്പന്നങ്ങളുടെ വിലയിലും വര്‍ദ്ധനവുണ്ടാകുമെന്ന് മില്‍മ വ്യക്തമാക്കി. പാലിന് അഞ്ചു രൂപയെങ്കിലും കൂടുമെന്ന് ക്ഷീരവികസന വകുപ്പ് മന്ത്രിജെ ചിഞ്ചുറാണി നേരത്തെ അറിയിച്ചിരുന്നു.
അതേസമയം, സംസ്ഥാനത്ത് മദ്യവിലയിലും വര്‍ദ്ധനവ് ഉണ്ടാകും. കേരളത്തിലുണ്ടാക്കുന്ന മദ്യത്തിന്‍റെ വിറ്റുവരവ് നികുതി ഒഴിവാക്കാന്‍ സര്‍ക്കാര്‍ തീരുമാനിച്ച സാഹചര്യത്തില്‍, ഇതുമൂലമുണ്ടാകുന്ന നഷ്ടം നികത്താനാണ് വില വര്‍ദ്ധിപ്പിക്കുന്നത്.
മദ്യത്തിന് രണ്ട് ശതമാനം അതായത് പരമാവധി പത്ത് രൂപയുടെ വര്‍ദ്ധനവുണ്ടായേക്കുമെന്നാണ് റിപ്പോര്‍ട്ടുകള്‍. മദ്യ ഉത്പാദകരില്‍ നിന്നും ഈടാക്കിയിരുന്ന അഞ്ച് ശതമാനം നികുതിയാണ് സര്‍ക്കാര്‍ ഒഴിവാക്കിയത്. കഴിഞ്ഞ വര്‍ഷം ഫെബ്രുവരിയിലാണ് സംസ്ഥാനത്ത് അവസാനം മദ്യ വില കൂട്ടിയത്. ഒരു കുപ്പി മദ്യത്തിന് 10 രൂപ മുതല്‍ 90 രൂപ വരെയാണ് വര്‍ദ്ധിപ്പിച്ചിരുന്നത്.
Monday, September 25, 2023