മിനിറ്റുകള്‍ക്കുള്ളില്‍ വിറ്റുപോയത് എട്ട് ലക്ഷം ജേഴ്സികള്‍:
റൊണാള്‍ഡോയുടെ റെക്കോര്‍ഡ് തകര്‍ത്ത് മെസി

പാരീസ്: സൂപ്പര്‍ താരം ലയണല്‍ മെസിയുടെ പിഎസ്ജിയിലെ 30ാം നമ്പര്‍ ജേഴ്സി അരമണിക്കൂറിനുള്ളില്‍ വിറ്റുതീര്‍ന്നത് എട്ട് ലക്ഷം ജേഴ്സികള്‍. മെസി ഫ്രഞ്ച് ക്ലബ് പിഎസ്ജിയുമായി കരാര്‍ ഒപ്പിട്ടതിന് തൊട്ടുപിന്നാലെയാണ് ജേഴ്സി വിറ്റുതീര്‍ന്നത്. 832,000 ജേഴ്സികള്‍ വിറ്റു പോയതായാണ് റിപ്പോര്‍ട്ട്. ഇതിലൂടെ ജേഴ്സി വില്‍പ്പനയുടെ ആദ്യ ദിനം തന്നെ 90 മില്യണ്‍ യൂറോയുടെ വരുമാനമാണ് പിഎസ്ജി സ്വന്തമാക്കിയത്.
2018ല്‍ ക്രിസ്റ്റ്യാനോ റൊണാള്‍ഡോ റയലില്‍ നിന്ന് യുവന്‍റസിലേക്ക് ചേക്കേറിയപ്പോള്‍ 520,000 ജേഴ്സികള്‍ വിറ്റുപോയിരുന്നു. ആ റെക്കോര്‍ഡാണ് മെസി പഴങ്കഥയാക്കിയത്. രണ്ടു വര്‍ഷത്തെ കരാറിലാണ് മെസി പിഎസ്ജിയിലെത്തിയത്. ആവശ്യമെങ്കില്‍ കരാര്‍ ഒരു വര്‍ഷത്തേക്ക് കൂടി ദീര്‍ഘിപ്പിക്കാനുള്ള വ്യവസ്ഥയുമുണ്ട്. മെസിക്കായുള്ള കരാര്‍ യാഥാര്‍ഥ്യമായതോടെ മെസിനെയ്മര്‍എംബാപ്പെ ത്രയത്തിന്‍റെ പ്രകടനങ്ങള്‍ കാണാനുള്ള കാത്തിരിപ്പിലാണ് ഫുട്ബോള്‍ ലോകം.
ആഴ്ചയില്‍ 7,69,230 യൂറോ (ഏഴു കോടിയോളം രൂപ) ആയിരിക്കും മെസിയുടെ പ്രതിഫലം. അങ്ങനെയായാല്‍ പ്രതിവര്‍ഷം 40 മില്യണ്‍ യൂറോ (350 കോടിയോളം രൂപ) മെസിക്ക് ലഭിക്കും. ഒരു ദിവസം മെസിയുടെ പ്രതിഫലം 109,890 യൂറോയാണ് (96 ലക്ഷത്തോളം രൂപ). മണിക്കൂറിന് 4579 യൂറോയും (നാല് ലക്ഷത്തോളം രൂപയും) മിനിട്ടിന് 76 യൂറോയും (6,634 രൂപ) പിഎസ്ജി മെസിക്ക് നല്‍കും.