കോഴിക്കോട്: സൗരോര്‍ജ മേഖലയിലെ പുതിയ സാങ്കേതിക വിദ്യകളും ഉല്‍പ്പന്ന വൈവിധ്യങ്ങളും പരിചയപ്പെടുത്തുന്ന ഗ്രീന്‍ എനര്‍ജി എക്സ്പോ നവംബര്‍ 17,18,19 തീയതികളില്‍ കോഴിക്കോട് സരോവരം ബയോ പാര്‍ക്കിന് സമീപമുള്ള കാലിക്കറ്റ് ട്രേഡ് സെന്‍ററില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തിലറിയിച്ചു . കേന്ദ്ര റിന്യൂവബിള്‍ എനര്‍ജി മന്ത്രാലയത്തിന്‍റെ അനുമതിയുടെ പ്രവര്‍ത്തിക്കുന്ന സോളാര്‍ വിപണന രംഗത്തെ സ്ഥാപനങ്ങളുടെ കൂട്ടായ്മയായ മാസ്റ്റേഴ്സിന്‍റെ നേതൃത്വത്തിലാണ് എക്സ്പോ സംഘടിപ്പിക്കുന്നത്.
17ന് രാവിലെ 11 മണിക്ക് ഡെപ്യൂട്ടി മേയര്‍ മുസാഫര്‍ അഹമ്മദ് ഉദ്ഘാടനം ചെയ്യും. തുടര്‍ന്ന് ജോബ് ഫെയര്‍ നടക്കും.500 ലേറെ വരുന്ന കേരളത്തിലെ സോളാര്‍ രംഗത്തെ സ്ഥാപനങ്ങളിലേക്ക് ആവശ്യമായ ജീവനക്കാരെ കണ്ടെത്തുന്നതിനുള്ള ജോബ് ഫെയറാണ് സംഘടിപ്പിക്കുന്നത്. ദിവസവും രാത്രി ഏഴുമണി മുതല്‍ കാലിക്കറ്റ് ട്രേഡ് സെന്‍റര്‍ വേദിയില്‍ സാംസ്കാരിക പരിപാടികള്‍ ഉണ്ടാകും. റോഡ്ഷോ, ബോധവല്‍ക്കരണ സദസ്സുകള്‍ തുടങ്ങിയ വൈവിധ്യമാര്‍ന്ന പരിപാടികളും നടക്കും.സൗരോര്‍ജവുമായി ബന്ധപ്പെട്ട വിഷയങ്ങളില്‍ വിദഗ്ധര്‍ നടത്തുന്ന സെമിനാറുകളും സംവാദവും സംഘടിപ്പിക്കും. പാരമ്പര്യേതര ഊര്‍ജോല്‍പദനം, സംഭരണം, ഉപയോഗം,മാലിന്യ സംസ്കരണം തുടങ്ങിയ മേഖലകളില്‍ പ്രോജക്റ്റായോ സംരംഭങ്ങളായോ വിദ്യാര്‍ത്ഥികള്‍ മുന്നോട്ടുവെച്ച ആശയങ്ങള്‍ക്കും വാണിജ്യ മാതൃകകള്‍ക്കും എക്സ്പോയില്‍ സൗജന്യ സ്റ്റാളുകള്‍ ഒരുക്കിയിട്ടുണ്ടെന്ന് മാസ്റ്റര്‍ ഭാരവാഹികള്‍ അറിയിച്ചു.
Monday, February 17, 2025