.അക്രമസംഭവങ്ങളെ ഉന്നതവിദ്യാഭ്യാസ വകുപ്പ് വളരെ ഗൗരവത്തോടെയാണ് കാണുന്നതെന്നും മന്ത്രി
കൊച്ചി: സംഘര്ഷത്തെ തുടര്ന്ന് അടച്ചിട്ട എറണാകുളം മഹാരാജാസ് കോളേജ് ഉടന് തുറക്കുമെന്ന് ഉന്നതവിദ്യാഭ്യാസ വകുപ്പ് മന്ത്രി ആര്. ബിന്ദു. കോളേജിലുണ്ടായ അക്രമസംഭവങ്ങളെ ഗൗരവത്തോടെ കാണുന്നുവെന്നും മന്ത്രി വാര്ത്താക്കുറിപ്പില് വ്യക്തമാക്കി. മഹാരാജാസ് കോളേജില് ഒരു വിദ്യാര്ത്ഥിയ്ക്ക് കുത്തേറ്റതുള്പ്പെടെ, വിദ്യാര്ത്ഥികള്ക്കും ഒരദ്ധ്യാപകനും നേര്ക്കുണ്ടായ അക്രമസംഭവങ്ങളെ ഉന്നതവിദ്യാഭ്യാസ വകുപ്പ് വളരെ ഗൗരവത്തോടെയാണ് കാണുന്നത്. ഭാവിയില് കോളേജില് ഇത്തരം സംഘര്ഷസാഹചര്യം ഉരുത്തിരിയാന് ഇടവരുന്നത് ഒഴിവാക്കാന് കോളേജ് അധികൃതര്ക്ക് നിര്ദ്ദേശം നല്കിയിട്ടുണ്ടെന്നും മന്ത്രി വ്യക്തമാക്കി.
തിങ്കളാഴ്ച രക്ഷാകര്തൃ സമിതി യോഗവും ബുധനാഴ്ച വിദ്യാര്ത്ഥി സര്വ്വകക്ഷി യോഗവും ചേര്ന്ന ശേഷം എത്രയും പെട്ടെന്ന് കോളേജ് തുറന്നു പ്രവര്ത്തിപ്പിക്കും. ക്ലാസുകള് നഷ്ടപ്പെടാതിരിക്കാന് ഈ ദിവസങ്ങളില് ഓണ്ലൈന് ക്ലാസുകള് തുടരാന് ക്രമീകരണം ഒരുക്കിയിട്ടുണ്ടെന്നും മന്ത്രി ഡോ. ബിന്ദു അറിയിച്ചു.
