ഇംഫാല്: മണിപ്പൂരില് വീണ്ടും കലാപം രൂക്ഷമാകുകയാണ്. ഇക്കഴിഞ ദിവസം നടന്ന സംഘര്ഷത്തില് കൊല്ലപ്പെട്ടവരുടെ എണ്ണം ആറായി. അക്രമികള് നിരവധി വീടുകള്ക്ക് തീയിട്ടു. ബിഷ്ണുപൂരില് സൈന്യത്തിന് നേരെയും ആക്രമണം നടന്നു.
ഇംഫാല് മുതല് ബിഷ്ണുപൂര് വരെയുള്ള മേഖലകളില് വ്യാപക അക്രമങ്ങളാണ് നടന്നത്. ക്വാക്ടയില് മെയ്തേയി വിഭാഗത്തിലെ മൂന്ന് പേര് കൊല്ലപ്പെട്ടതോടെയാണ് സ്ഥിതി രൂക്ഷമായത്
തുടര്ന്ന് കുക്കി മേഖലകളിലുണ്ടായ സംഘര്ഷത്തില് മൂന്നു പേര് കൂടി കൊല്ലപ്പെട്ടു. ഇംഫാലില് 22 വീടുകള്ക്ക് തീയിട്ടു. 18 പേര്ക്ക് ഇക്കഴിഞ്ഞ ദിവസം നടന്ന സംഘര്ഷത്തില് പരുക്കേറ്റു.
ഇതില് ഒരു പോലീസുകാരനും ഉള്പ്പെടുന്നു. ഇംഫാലില് ഇന്നലെയും പ്രതിഷേധം നടന്നു. ലാംഗോലില് കുകികളുടെ ആളൊഴിഞ്ഞ വീടുകള്ക്ക് നേരെ വ്യാപക ആക്രമുണ്ടായി. ചുരചന്ദ്പ്പൂര്, ബീഷ്ണുപൂര് എന്നിവിടങ്ങളില് ഇന്നലെ വെടിവെപ്പ് നടന്നതായി റിപ്പോര്ട്ടുകളുണ്ട്.
ബിഷ്ണൂപൂരില് പരിശോധന നടക്കുന്നതിനിടെയാണ് സൈന്യത്തിന് നേരെ വെടിവെപ്പുണ്ടായത്. സൈന്യം ശക്തമായി തിരിച്ചടിച്ചു. സര്ക്കാരുമായി സമാധാന കരാറില് ഏര്പ്പെട്ടിട്ടില്ലാത്ത കിയ ഗ്രൂപ്പിലെ ഒരാളെ പരുക്കുകളോടെ പിടികൂടി. ഇതിനിടെ കൊള്ളയടിക്കപ്പെട്ട ആയുധങ്ങള്ക്കായി സുരക്ഷസേനയുടെയും പോലീസിന്റെയും പരിശോധന തുടരുകയാണ്. 1057 തോക്കുകളും 14000 വെടിയുണ്ടകളും മെയ്തെ മേഖലകളില് നിന്ന് പിടികൂടി. കുക്കി മേഖലയില് നിന്ന് 138 തോക്കുകളും കണ്ടെത്തി. സംഘര്ഷ സാഹചര്യം കണക്കിലെടുത്ത് 10 കമ്പനി കേന്ദ്രസേനയെ കൂടി സംസ്ഥാനത്ത് വിന്യസിച്ചു.
