ചെങ്കല്പേട്ട്: തമിഴ്നാട് ചെങ്കല്പേട്ടില് ലോറി കയറിയിറങ്ങി നാല് വിദ്യാര്ത്ഥികള് മരിച്ചു. ബസില്നിന്നും വീണ വിദ്യാര്ത്ഥികളുടെ ശരീരത്തിലൂടെ ലോറി കയറിയിറങ്ങുകയായിരുന്നു. മോനിഷ്, കമലേഷ്, ധനുഷ് എന്നിവര് അപകടസ്ഥലത്തും രഞ്ജിത്ത് എന്ന വിദ്യാര്ത്ഥി ആശുപത്രിയില്വച്ചുമാണ് മരിച്ചത്. അഞ്ച് പേര്ക്ക് പരിക്കേറ്റു.
ചൊവ്വാഴ്ച രാവിലെ ചെന്നൈ തിരുച്ചിറപ്പള്ളി ദേശീയപാതയിലാണ് സംഭവം. വിദ്യാര്ത്ഥികള് ബസിന്റെ ഫുട്ബോര്ഡില് നിന്ന് യാത്ര ചെയ്യുന്നതിനിടെയാണ് അപകടം. ഒരു ലോറിയെ ബസ് ഓവര്ടേക്ക് ചെയ്യുന്നതിനിടെ ചെറുതായി തട്ടുകയും വെട്ടിച്ചുമാറ്റിയപ്പോള് ഫുട്ബോര്ഡില്നിന്നവര് പുറത്തേയ്ക്കു തെറിച്ചു വീഴുകയുമായിരുന്നു എന്നാണ് വിവരം. നാല് വിദ്യാര്ത്ഥികളുടെ ശരീരത്തിലൂടെ ലോറി കയറിയിറങ്ങി.