ഭുവനേശ്വര്: മുന് സുരക്ഷ ഉദ്യോഗസ്ഥനായിരുന്ന പൊലീസുകാരന്റെ വെടിയേറ്റ ഒഡിഷ മന്ത്രി നബ കിഷോര് ദാസ് മരിച്ചു.ഗുരുതരാവസ്ഥയില് ചികിത്സയിലിരിക്കെയാണ് മരണം. ആരോഗ്യമന്ത്രിയും ബി.ജെ.ഡി നേതാവുമായ നബ കിഷോര് ദാസിന് നെഞ്ചിലാണ് വെടിയേറ്റിരുന്നത്. ഞായറാഴ്ച ഉച്ചക്കായിരുന്നു സംഭവം.
മന്ത്രിയുടെ മുന് സുരക്ഷ ഉദ്യോഗസ്ഥനായിരുന്ന എ.എസ്.ഐ ഗോപാല് കൃഷ്ണദാസ് ആണ് വെടിവെച്ചത്. ഇയാളെ അറസ്റ്റ് ചെയ്തിട്ടുണ്ട്.ഝാര്സുഗുഡ ജില്ലയിലെ ബ്രജ്രാജ് നഗര് മുന്സിപ്പാലിറ്റി ചെയര്മാന്റെയും വൈസ് ചെയര്മാന്റെയും ഓഫിസുകള് ഉദ്ഘാടനം ചെയ്യാനെത്തിയപ്പോഴാണ് മന്ത്രിക്ക് നേരെ വെടിവെപ്പുണ്ടായത്. കാറില് നിന്ന് ഇറങ്ങുന്നതിനിടെ നെഞ്ചിലേക്ക് രണ്ട് റൗണ്ട് വെടിയുതിര്ക്കുകയായിരുന്നു.വെടിവെക്കാനുണ്ടായ കാരണം വ്യക്തമായിട്ടില്ല. മന്ത്രിയുടെ മുന് സുരക്ഷ ഉദ്യോഗസ്ഥനായിരുന്ന കൃഷ്ണദാസിനെ അടുത്തിടെയാണ് ചുമതലകളില് നിന്ന് നീക്കിയത്.