. പുതുപ്പള്ളി ഉപതെരഞ്ഞെടുപ്പ് കഴിഞ്ഞ് ചിലത് പറയാനുണ്ടെന്നും മുരളി
കോഴിക്കോട്: ലോക്സഭാ തെരഞ്ഞെടുപ്പില്‍ മത്സരിക്കാനില്ലെന്ന സൂചന നല്‍കി കോണ്‍ഗ്രസ് നേതാവ് കെ.മുരളീധരന്‍. എം.പി.ഈ ലോക്സഭാ കാലാവധി കഴിഞ്ഞാല്‍ കുറച്ചുകാലം പൊതു പ്രവര്‍ത്തന രംഗത്തുനിന്ന് മാറിനില്‍ക്കണമെന്ന് ആഗ്രഹിക്കുന്നതായി അദ്ദേഹം അറിയിച്ചു.
കെ. കരുണാകരന്‍റെ സ്മാരകം നിര്‍മിക്കുന്നതില്‍ ശ്രദ്ധ കേന്ദ്രീകരിക്കണം. അതുവരെ പൊതുപ്രവര്‍ത്തനത്തില്‍ നിന്ന് മാറി നില്‍ക്കാന്‍ ആഗ്രഹിക്കുന്നെന്നും അദ്ദേഹം പറഞ്ഞു.
പുതുപ്പള്ളി തെരഞ്ഞെടുപ്പ് കഴിഞ്ഞ് ചിലത് പറയാനുണ്ടെന്നും അദ്ദേഹം പറഞ്ഞു. കോണ്‍ഗ്രസ് പ്രവര്‍ത്തകസമിതിയില്‍ ഉള്‍പ്പെടുത്താത്തതില്‍ ചെന്നിത്തലയുടെ അതൃപ്തിയെക്കുറിച്ചുള്ള മാധ്യമപ്രവര്‍ത്തകരുടെ ചോദ്യത്തോടായിരുന്നു പ്രതികരണം. പ്രവര്‍ത്തകസമിതി പുന:സംഘടനയുമായി ബന്ധപ്പെട്ട് മുരളീധരനും അതൃപ്തിയുണ്ടെന്നാണ് സൂചന.
ഉമ്മന്‍ചാണ്ടിയെപ്പറ്റി നല്ലത് സംസാരിച്ചതിന് ജോലിയില്‍നിന്ന് മൃഗാശുപത്രിയിലെ താത്കാലിക ജീവനക്കാരിയെ പിരിച്ചുവിട്ട സംഭവത്തിലും അദ്ദേഹം പ്രതികരിച്ചു. പാവങ്ങളെ സി.പി.എമ്മിന് വേണ്ട. അതാണ് താത്ക്കാലിക ജീവനക്കാരിയെ പിരിച്ചുവിട്ടതെന്നും മുരളീധരന്‍ കുറ്റപ്പെടുത്തി.മലക്കം മറിഞ്ഞെങ്കിലും സച്ചിദാനന്ദന്‍ ചില സത്യങ്ങള്‍ പറഞ്ഞല്ലോ. യഥാര്‍ഥ കമ്മ്യൂണിസ്റ്റിന്‍റെ തോന്നലാണ് അദ്ദേഹം പറഞ്ഞത്. ബംഗാളിലേയും ത്രിപുരയിലേയും പോലെ കമ്മ്യൂണിസ്റ്റ് പാര്‍ട്ടി നശിക്കാതിരിക്കണമെങ്കില്‍ മൂന്നാംതവണ അധികാരത്തില്‍ വരരുതെന്ന് പറഞ്ഞത് സദുദ്ദേശത്തിലാണ്. മുരളീധരന്‍ അഭിപ്രായപ്പെട്ടു.
