പടക്ക നിര്‍മാണ കേന്ദ്രത്തില്‍ പൊട്ടിത്തെറി; അഞ്ച് മരണം

Top News

ചെന്നൈ: മധുര തിരുമംഗലം വടക്കംപട്ടി അഴകുസിറൈ ഗ്രാമത്തിലെ സ്വകാര്യ പടക്ക നിര്‍മാണ കേന്ദ്രത്തിലുണ്ടായ സ്ഫോടനത്തില്‍ സ്ത്രീ ഉള്‍പ്പെടെ അഞ്ച് തൊഴിലാളികള്‍ മരിച്ചു.13 പേര്‍ക്ക് പരിക്കേറ്റു.വ്യാഴാഴ്ച ഉച്ചക്ക് ഒന്നരയോടെ ഉണ്ടായ പൊട്ടിത്തെറിയില്‍ വല്ലരസു, ഗോപി, വിക്കി, അമ്മാസി, പ്രേമ എന്നിവര്‍ സംഭവസ്ഥലത്ത് മരിച്ചു. മൂന്ന് കെട്ടിടങ്ങളിലെ വെടിമരുന്ന് ഗോഡൗണുകളില്‍ ജോലി ചെയ്തിരുന്നവരാണ് അപകടത്തില്‍പ്പെട്ടത്. മൃതദേഹങ്ങള്‍ ചിന്നിചിതറിയ നിലയിലാണ് കണ്ടെടുത്തത്. കെട്ടിടങ്ങള്‍ നിലംപരിശായിരുന്നു.
അഗ്നിശമന രക്ഷാ സേനയും നാട്ടുകാരും രക്ഷാ പ്രവര്‍ത്തനം നടത്തി. പരിക്കേറ്റവരെ മധുര രാജാജി ഗവ. ആശുപത്രിയില്‍ പ്രവേശിപ്പിച്ചു. ഇവരില്‍ പലരുടെയും നില ഗുരുതരമായതിനാല്‍ മരണ സംഖ്യ ഉയര്‍ന്നേക്കുമെന്നും ആശങ്കയുണ്ട്.തൊഴിലാളികളില്‍ ഭൂരിഭാഗവും ഉച്ചഭക്ഷണത്തിനായി പോയിരുന്നതിനാല്‍ ആളപായം കുറഞ്ഞതായി പൊലീസ് അറിയിച്ചു. വെടിമരുന്ന് മിശ്രിതം തയാറാക്കുന്നതിനിടെ ഉണ്ടായ തീപിടിത്തമാണ് അപകടത്തിന് കാരണമായതെന്ന് കരുതുന്നു. റവന്യു- പൊലീസ് അധികൃതര്‍ അന്വേഷണം നടത്തുന്നു.

Leave a Reply

Your email address will not be published. Required fields are marked *