നെടുമ്പാശ്ശേരിയില്‍ രണ്ടരക്കോടിയുടെ സ്വര്‍ണ്ണം പിടിച്ചെടുത്തു

കൊച്ചി: നെടുമ്പാശ്ശേരി വിമാനത്താവളത്തില്‍ വന്‍ സ്വര്‍ണ്ണവേട്ട. രണ്ടരക്കോടി രൂപ വിലമതിക്കുന്ന സ്വര്‍ണ്ണം പിടികൂടി.ഇറച്ചി മുറിക്കുന്ന യന്ത്രത്തില്‍ ഒളിപ്പിച്ച നിലയിലാണ് സ്വര്‍ണ്ണം പിടിച്ചെടുത്തത്.ദുബായില്‍ നിന്നെത്തിയ കാര്‍ഗോയിലാണ് സ്വര്‍ണ്ണം ഉണ്ടായിരുന്നത്. സിറാജുദ്ദീന്‍ എന്നയാളാണ് സ്വര്‍ണ്ണം അയച്ചതെന്ന് കസ്റ്റംസ് അറിയിച്ചു.
തൃക്കാക്കര തുരുത്തേല്‍ എന്‍റര്‍പ്രൈസിന്‍റെ പേരിലാണ് സ്വര്‍ണ്ണം എത്തിയത്.പാഴ്സല്‍ എടുക്കാനെത്തിയ ഡ്രൈവര്‍ നകുലാണ് പിടിയിലായത്. യന്ത്രം തുറക്കാന്‍ സാധിക്കാത്തതിനാല്‍ കട്ടര്‍ ഉപയോഗിച്ച് മുറിച്ചാണ് സ്വര്‍ണ്ണം പുറത്തെടുത്തത്. രണ്ടേകാല്‍ കിലോയോളം വരുന്ന ചെറുതും വലുതുമായ നാല് സ്വര്‍ണ്ണക്കട്ടികള്‍ കണ്ടെടുത്തു.