തദ്ദേശ ഉപതിരഞ്ഞെടുപ്പ് ഫലം; ഒപ്പത്തിനൊപ്പം എല്‍ ഡി എഫും, യു ഡി എഫും

തിരുവനന്തപുരം: പിറവം മുനിസിപ്പാലിറ്റി ഭരണം നിലനിര്‍ത്തി എല്‍ ഡി എഫ്. ഇടപ്പള്ളിച്ചിറ വാര്‍ഡിലേക്ക് നടന്ന ഉപതിരഞ്ഞെടുപ്പില്‍ 26 വോട്ടുകളുടെ ഭൂരിപക്ഷത്തിനാണ് എല്‍ ഡി എഫ് സ്ഥാനാര്‍ത്ഥിയായ ഡോ അജേഷ് മനോഹര്‍ വിജയിച്ചത്.
മുന്‍സിപ്പാലിറ്റിയില്‍ എല്‍ ഡി എഫിനും യു ഡി എഫിനും തുല്യ അംഗബലമായതിനാല്‍ വാശിയേറിയ പോരാട്ടമാണ് ഇവിടെ നടന്നത്.
കോഴിക്കോട് കൂടരഞ്ഞി പഞ്ചായത്തിലെ കൂമ്ബാറ വാര്‍ഡ് 47 വോട്ടിന് എല്‍ ഡി എഫ് നിലനിര്‍ത്തി. ആലപ്പുഴ അരൂര്‍. പാലക്കാട് ശ്രീകൃഷ്ണപുരം, കോഴിക്കോട് നന്മണ്ട ജില്ലാ പഞ്ചായത്ത് ഡിവിഷനുകളില്‍ സി പി എമ്മാണ് ലീഡ് ചെയ്യുന്നത്. ഇടമലക്കുടിയില്‍ എല്‍ഡിഎഫിന്‍റെ സിറ്റിംഗ് സീറ്റ് ബിജെപി പിടിച്ചു.
വാശിയേറിയ പോരാട്ടത്തിനൊടുവില്‍ ഇരിങ്ങാലക്കുട നഗരസഭാ ഭരണം യു ഡി എഫ് നിലനിര്‍ത്തി. 151 വോട്ടിന്‍റെ ഭൂരിപക്ഷത്തിലാണ് യു ഡി എഫ് സ്ഥാനാര്‍ത്ഥി വിജയിച്ചത്.കോഴിക്കോട് ഉണ്ണികുളം പഞ്ചായത്തിലെ വള്ളിയോട് വാര്‍ഡ് 530 വോട്ടിന്‍റെ ഭൂരിപക്ഷത്തില്‍ മുസ്ലിം ലീഗിലെ ഒ.എം ശശീന്ദ്രന്‍ വിജയിച്ചു.
കൊച്ചി കോര്‍പറേഷനിലെ ഗാന്ധിനഗര്‍ വാര്‍ഡ് എല്‍ ഡി എഫ് നിലനിര്‍ത്തി. 687 വോട്ടിന്‍റെ ഭൂരിപക്ഷത്തിലാണ് സി പി എം സ്ഥാനാര്‍ത്ഥി ബിന്ദു ശിവന്‍ വിജയിച്ചത്. കെ ശിവന്‍റെ മരണത്തെ തുടര്‍ന്നാണ് ഇവിടെ ഉപതിരഞ്ഞെടുപ്പ് നടത്തേണ്ടി വന്നത്. കോട്ടയം കാണക്കാരി പഞ്ചായത്തില്‍ എല്‍ ഡി എഫ് ആണ് വിജയിച്ചത്. കളരിപ്പടി വാര്‍ഡില്‍ 338 വോട്ടിന്‍റെ ഭൂരിപക്ഷത്തിലാണ് സി പി എമ്മിലെ വി ജി അനില്‍കുമാര്‍ വിജയിച്ചത്. കോണ്‍ഗ്രസിന്‍റെ സിറ്റിംഗ് സീറ്റായിരുന്നു.
മാഞ്ഞൂര്‍ പഞ്ചായത്തിലെ പന്ത്രണ്ടാം വാര്‍ഡില്‍ യു ഡി എഫ് സ്ഥാനാര്‍ത്ഥി സുനു ജോര്‍ഡ് 252 വോട്ടിന് വിജയിച്ചു. കാഞ്ഞങ്ങാട് നഗരസഭയിലെ ഒഴിഞ്ഞവളപ്പ് വാര്‍ഡും യു ഡി എഫ് നിലനിര്‍ത്തി.
116 വോട്ടുകളുടെ ഭൂരിപക്ഷത്തിലാണ് കോണ്‍ഗ്രസ് സ്ഥാനാര്‍ത്ഥി കെ.കെ ബാബുവിന്‍റെ വിജയം. പൂക്കോട്ടൂര്‍ പഞ്ചായത്തിലെ ചീനിക്കല്‍ ഡിവിഷനില്‍ മുസ്ലിം ലീഗിലെ അബ്ദുള്‍സത്താര്‍ 710 വോട്ടിന്‍റെ ഭൂരിപക്ഷത്തില്‍ വിജയിച്ചു.
തിരുവനന്തപുരം കോര്‍പറേഷനിലെ വെട്ടുകാട് വാര്‍ഡില്‍ 1490 വോട്ടിന്‍റെ ഭൂരിപക്ഷത്തില്‍ സിപിഎം സ്ഥാനാര്‍ത്ഥിയായ ക്ലൈനസ് റൊസാരിയ വിജയിച്ചു. വിതുര ഗ്രാമപഞ്ചായത്തിലെ മൂന്നാം വാര്‍ഡായ പൊന്നാംചുണ്ട് 45 വോട്ടിന് എല്‍ഡിഎഫ് സ്ഥാനാര്‍ത്ഥി എസ്.രവികുമാര്‍ വിജയിച്ചു. പോത്തന്‍കോട് ബ്ലോക്ക് 495 വോട്ടുകള്‍ക്ക് എല്‍ഡിഎഫ് ലീഡ് ചെയ്യുന്നു. കൊല്ലം തേവലക്കര പഞ്ചായത്തിലെ നടുവിലക്കര വാര്‍ഡില്‍ യുഡിഎഫ് സ്ഥാനാര്‍ത്ഥിയായ പ്രദീപ് കുമാര്‍ 317 വോട്ടിന്‍റെ ഭൂരിപക്ഷത്തില്‍ വിജയിച്ചു.
ഇടുക്കി രാജാക്കാട് പഞ്ചായത്തിലെ കുരിശുംപടി വാര്‍ഡില്‍ യുഡിഎഫ് സ്ഥാനാര്‍ത്ഥി പ്രിന്‍സ് തോമസ് 429 വോട്ടിന്‍റെ ഭൂരിപക്ഷത്തില്‍ വിജയിച്ചു. ഒങ്ങല്ലൂര്‍ പഞ്ചായത്തിലെ എട്ടാം വാര്‍ഡില്‍ സിപിഎം സ്ഥാനാര്‍ത്ഥി കെ അശോകന്‍ 380 വോട്ടിന് ബിജെപി സ്ഥാനാര്‍ത്ഥിയെ പരാജയപ്പെടുത്തി. പാലക്കാട് കുഴല്‍മന്ദം ബ്ലോക്ക് പഞ്ചായത്ത് ഡിവിഷനില്‍ സി പി എം സ്ഥാനാര്‍ത്ഥി സോമദാസന്‍ 1381 വോട്ടിന് വിജയിച്ചു.