പാലക്കാട്: ട്രെയിനില് കടത്തുകയായിരുന്ന 9.5 കിലോ കഞ്ചാവ് പിടികൂടി. പാറ്റ്ന എറണാകുളം എക്സ്പ്രസില് എറണാകുളത്തേക്ക് കടത്തിക്കൊണ്ടുപോവുകയായിരുന്നുവെന്ന് സംശയിക്കുന്ന 9.5 കിലോ കഞ്ചാവ് പാലക്കാട് ആര്.പി.എഫ് ക്രൈം ഇന്റലിജന്സ് ബ്രാഞ്ചും പാലക്കാട് എക്സൈസ് സര്ക്കിള് സംഘവും സംയുക്തമായി പാലക്കാട് ജംഗ്ഷന് റെയില്വേ സ്റ്റേഷനില് നടത്തിയ പരിശോധനയിലാണ് പിടികൂടിയത്.
ജനറല് കമ്പാര്ട്ട്മെന്റില് സീറ്റിനടിയില് ബാഗിനുള്ളില് ഒളിപ്പിച്ച നിലയില് ആയിരുന്നു കഞ്ചാവ് സൂക്ഷിച്ചിരുന്നത്. കഴിഞ്ഞ പത്ത് ദിവസത്തിനുള്ളില് പാലക്കാട് ആര്.പി.എഫ് ക്രൈം ഇന്റലിജന്സ് ബ്രാഞ്ച് 52 കിലോ കഞ്ചാവാണ് പാലക്കാട് ജംഗ്ഷന് റെയില്വേ സ്റ്റേഷനില് നിന്ന് മാത്രം പിടിച്ചെടുത്തത്. വരും ദിവസങ്ങളിലും പരിശോധന ശക്തമാക്കുമെന്നും കുറ്റവാളികള്ക്കെതിരെ ശക്തമായ നടപടി സ്വീകരിക്കുമെന്നും ആര്.പി.എഫ് കമാന്ഡന്റ് ജതിന് ബി. രാജ് അറിയിച്ചു.
ആര്.പി.എഫ് അസിസ്റ്റന്റ് സബ് ഇന്സ്പെക്ടര് സജി അഗസ്റ്റിന്, അസിസ്റ്റന്റ് എക്സൈസ് ഇന്സ്പെക്ടര് പി. സന്തോഷ്, ആര്.പി.എഫ് കോണ്സ്റ്റബിള്മാരായ വി. സവിന്, എന്. അശോക്, സിവില് എക്സൈസ് ഓഫീസര് ടി.വി. അജീഷ്, എ. മുരളീധരന് എന്നിവര് പരിശോധനയില് പങ്കെടുത്തു.
