ന്യൂഡല്ഹി: ഏകദിന ലോകകപ്പിനും ഏഷ്യ കപ്പിനും ഏഷ്യന് ഗെയിംസിനും പിന്നാലെ ആസ്ട്രേലിയ്ക്കെതിരായ ടീമില്നിന്നും പുറത്തായതിനു പിറകെ നിര്വികാരമായൊരു സ്മൈലിയില് പ്രതികരണമൊതുക്കി മലയാളി താരം സഞ്ജു സാംസണ്.ഫേസ്ബുക്കിലെ പോസ്റ്റിലാണ് താരത്തിന്റെ പ്രതികരണം. പോസ്റ്റിനു താഴെ ആരാധകരുടെ കമന്റ്പ്രവാഹമാണ്.
വേദനയും നിരാശയും നിസ്സഹായതയും രോഷവുമെല്ലാം ഉള്ളടങ്ങിയിട്ടുള്ള വികാരപ്രകടനമായാണ് ആരാധകര് ഇതിനെ കാണുന്നത്. ആയിരക്കണക്കിന് ആരാധകര് താരത്തിനു പിന്തുണയുമായി എത്തിയിട്ടുണ്ട്. ധൈര്യമായിരിക്കാന് ആവശ്യപ്പെടുകയും ടീമിന്റെ ക്യാപ്റ്റനായി തന്നെ ഭാവിയില് വരുമെന്ന് പ്രതീക്ഷ പങ്കുവയ്ക്കുകയും ചെയ്യുന്നുണ്ട് അവര്.
സഞ്ജുവിനോടുള്ള അവഗണനയില് മുന് ഇന്ത്യന് ഓള്റൗണ്ടര് ഇര്ഫാന് പത്താന് നേരത്തെ പ്രതികരിച്ചിരുന്നു. താനാണ് സഞ്ജുവിന്റെ സ്ഥാനത്തെങ്കില് കടുത്ത നിരാശവാനായിരിക്കുമെന്നായിരുന്നു പത്താന്റെ പ്രതികരണം.
‘എക്സി’ലൂടെയാണ് ടീം സെലക്ഷനെതിരെ പത്താന്റെ പരോക്ഷ വിമര്ശനം.ഏകദിനത്തില് മികച്ച ട്രാക്ക് റെക്കോര്ഡുണ്ടായിട്ടും സഞ്ജുവിനെ നിരന്തരം തഴയുന്നതിന്റെ യുക്തി എന്താണെന്നാണ് ആരാധകര് ചോദിക്കുന്നത്. മറുവശത്ത്, നിരവധി തവണ അവസരം ലഭിച്ചിട്ടും സൂര്യകുമാര് യാദവ് എല്ലാ ടീമുകളിലും ഇടംകണ്ടെത്തുന്നു. ഒറ്റ ഏകദിനം മാത്രം കളിച്ച തിലക് വര്മയെയും നിരവധി തവണ അവസരം ലഭിച്ചിട്ടും മികവ് തെളിയിക്കാനാകാത്ത ഋതുരാജ് ഗെയ്ക്ക്വാദിനെയും വീണ്ടും ടീമിലെടുക്കുകയും ചെയ്യുന്നു.
