ജൂണ്‍ ഏഴു മുതല്‍ സംസ്ഥാനത്ത് ബസ് സമരം

Top News

കൊച്ചി :സംസ്ഥാനത്ത് ജൂണ്‍ ഏഴു മുതല്‍ സ്വകാര്യ ബസുകള്‍ അനിശ്ചിതകാല സമരത്തിലേക്ക് .വിദ്യാര്‍ത്ഥികളുടെ കണ്‍സെഷന്‍ നിരക്ക് വര്‍ധിപ്പിക്കണമെന്നാണ് പ്രധാന ആവശ്യം.ബസ് ഓണേഴ്സ് സംയുക്ത സമിതി കൊച്ചിയില്‍ ചേര്‍ന്ന യോഗത്തിലാണ് സമര പ്രഖ്യാപനം നടത്തിയത്.
12 ബസ് ഉടമസ്ഥ സംഘടനകളുടെ കമ്മിറ്റിയായ ബസ് ഓണേഴ്സ് സംയുക്ത സമരസമിതിയാണ് പ്രഖ്യാപനം നടത്തിയിരിക്കുന്നത്. വിദ്യാര്‍ത്ഥികളുടെ ബസ് ചാര്‍ജ് മിനിമം അഞ്ചു രൂപയെങ്കിലും ആക്കി ഉയര്‍ത്തണമെന്ന ജസ്റ്റിസ് രാമചന്ദ്രന്‍ കമ്മിഷന്‍ റിപ്പോര്‍ട്ട് അംഗീകരിക്കണമെന്നാണ് ഇവരുടെ പ്രധാന ആവശ്യം. മിനിമം അഞ്ചു രൂപയായും യാത്രാനിരക്കിന്‍റെ പകുതിയായും വര്‍ദ്ധിപ്പിക്കണമെന്നത് ഇതിലുള്‍പ്പെടുന്നു.നിലവില്‍ സര്‍വീസ് നടത്തുന്ന എല്ലാ സ്വകാര്യ ബസുകളുടേയും പെര്‍മിറ്റ് അതേപടി നിലനിര്‍ത്തണം. ലിമിറ്റഡ് സ്റ്റോപ് ബസുകള്‍ തുടരാന്‍ അനുവദിക്കണം.
വിദ്യാര്‍ത്ഥികളുടെ കണ്‍സെഷന്‍ യാത്രക്കു പ്രായപരിധി കൂടി ഏര്‍പ്പെടുത്തണമെന്ന് സ്വകാര്യ ബസുടമകള്‍ മുന്നോട്ടുവെക്കുന്നുണ്ട്. ഒപ്പം വിദ്യാര്‍ത്ഥികള്‍ക്ക് നല്‍കുന്ന കണ്‍സെഷന്‍ കാര്‍ഡുകളുടെ വിതരണം കുറ്റമറ്റതാക്കാനും ആവശ്യപ്പെടുന്നു.
അതേസമയം സ്കൂള്‍ തുറന്നുള്ള ആദ്യ ആഴ്ചയില്‍ തന്നെ ബസ് സമരം പ്രഖ്യാപിച്ചത് രക്ഷിതാക്കള്‍ക്കിടയിലും വിദ്യാര്‍ത്ഥികളുടെ ഇടയിലും പ്രതിഷേധത്തിനിടയാക്കിയിട്ടുണ്ട്.

Leave a Reply

Your email address will not be published. Required fields are marked *