ജനങ്ങള്‍ക്ക് തരൂരിനോട് സ്നേഹമുണ്ടെന്ന് മോന്‍സ് ജോസഫ്

കോട്ടയം: വിവാദങ്ങള്‍ക്കിടെ ശശിതരൂരിന് പിന്തുണയുമായി കേരള കോണ്‍ഗ്രസ് പി.ജെ ജോസഫ് വിഭാഗം നേതാവ് മോന്‍സ് ജോസഫ്. ശശി തരൂര്‍ യുഡിഎഫിന്‍റെ പ്രമുഖ നേതവാണ്. അദ്ദേഹത്തിന് അതിന്‍റെ സ്വീകാര്യതയുണ്ട്. ജനങ്ങള്‍ക്ക് തരൂരിനോട് സ്നേഹമുണ്ടെന്നും മോന്‍സ് ജോസഫ് പറഞ്ഞു.തരൂര്‍ കോട്ടയത്ത് എത്തുന്നത് പോസിറ്റീവായ കാര്യമാണ്. അനാവശ്യവിവാദം ഇക്കാര്യത്തില്‍ ഉണ്ടാക്കേണ്ട ആവശ്യമില്ല. യുഡിഎഫിനെ നല്ല രീതിയില്‍ വി.ഡി.സതീശന്‍ നയിക്കുന്നുണ്ടെന്നും അദ്ദേഹം അഭിപ്രായപ്പെട്ടു. സാധാരണയില്‍ നിന്നും വ്യത്യസ്തമായി ഒറ്റക്കെട്ടായാണ് യുഡിഎഫ് മുന്നോട്ട് പോകുന്നത്. ആ ഐക്യം നിലനിര്‍ത്തിയാല്‍ യുഡിഎഫിന് തിരിച്ചുവരാനാകും. ആ ഐക്യത്തിന് ദോഷം വരുന്നത് ആരും ചെയ്യരുതെന്നും മോന്‍സ് ജോസഫ് കൂട്ടിച്ചേര്‍ത്തു. അതിനിടെ മേയര്‍ ആര്യാ രാജേന്ദ്രനെതിരായ യുഡിഎഫ് സമരത്തില്‍ പങ്കെടുക്കുന്നില്ലെന്ന പ്രതിപക്ഷ നേതാവ് വി.ഡി.സതീശന്‍റെ പരോക്ഷ വിമര്‍ശനത്തിന് മറുപടിയുമായി ശശി തരൂര്‍ രംഗത്തുവന്നു. സമരത്തില്‍ പങ്കെടുക്കുന്നതിന് കാലതാമസം സംഭവിച്ചിട്ടില്ലെന്ന് തരൂര്‍ പറഞ്ഞു. നവംബര്‍ ഏഴിന് ആദ്യമായി മേയറുടെ രാജി ആവശ്യപ്പെട്ടത് താനാണെന്നും ഇത് വിസ്മരിക്കാന്‍ ചിലര്‍ ശ്രമിക്കുകയാണെന്നും തരൂര്‍ മറുപടിയായി പറഞ്ഞു.