ഗസ്സ സിറ്റി: ഇസ്രായേല് രൂക്ഷ ആക്രമണം തുടരുന്ന ഗസ്സയില് 24 മണിക്കൂറിനിടെ 100 പേര് കൊല്ലപ്പെട്ടു. 286 പേര്ക്ക് പരിക്കേറ്റതായും ഗസ്സ ആരോഗ്യ മന്ത്രാലയം അറിയിച്ചു.ഖാന് യൂനിസിലെ അല് നസര് ആശുപത്രിക്ക് സമീപം ഇസ്രായേല് നടത്തിയ ആക്രമണത്തില് 13 പേര് കൊല്ലപ്പെട്ടു. കൊല്ലപ്പെട്ടവരെല്ലാം ഒരു കുടുംബത്തിലെ അംഗങ്ങളാണ്. നിരവധി പേര്ക്ക് പരിക്കേറ്റു. ഖാന് യൂനിസിലെ യൂറോപ്യന് ആശുപത്രിക്ക് സമീപം ഇസ്രായേല് നടത്തിയ മറ്റൊരു ആക്രമണത്തില് രണ്ടു പെണ്കുട്ടികള് കൊല്ലപ്പെട്ടു.
വെസ്റ്റ് ബാങ്കില് ഇസ്രായേല് നടത്തിയ ആക്രമണത്തില് 15 പേര്ക്ക് പരിക്കേറ്റു. കൂടാതെ, 16 പേരെ അറസ്റ്റ് ചെയ്ത് കൊണ്ടുപോകുകയും ചെയ്തു.
ഒക്ടോബര് ഏഴ് മുതല് ഗസ്സയില് കൊല്ലപ്പെട്ടവരുടെ എണ്ണം 21,822 ആയി. ഇതില് 8,800 പേര് കുട്ടികളാണ്. ഗസ്സ മുനമ്പിലെ 70 ശതമാനം വീടുകളും ഇസ്രായേല് ബോംബിട്ട് തകര്ത്തിട്ടുണ്ട്.
അതേസമയം, ചെങ്കടലില് വീണ്ടും വ്യാപാരക്കപ്പലിന് നേര്ക്ക് ആക്രമണം. സിംഗപ്പൂരില് നിന്ന് ഈജിപ്തിലെ പോര്ട്ട് സൂയസിലേക്കുള്ള യാത്രാമധ്യേ തെക്കന് ചെങ്കടലില് വെച്ച് ഹാങ്സൗ എന്ന കപ്പലിനു നേരെയാണ് ആക്രമണം ഉണ്ടായത്.
Friday, January 24, 2025