കൊച്ചി: കോവിഡ് സൃഷ്ടിച്ച പ്രതികൂല സാഹചര്യങ്ങളിലും ഐടി കയറ്റുമതി രംഗത്തു കൊച്ചി ഇന്ഫോപാര്ക്കിനു നേട്ടം. ഇവിടെ പ്രവര്ത്തിക്കുന്ന ഐടി കമ്ബനികളില്നിന്നുള്ള ആകെ കയറ്റുമതി 6,310 കോടി രൂപയായി വര്ധിച്ചു.
മുന് വര്ഷം ഇതു 5,200 കോടി രൂപയായിരുന്നു. കഴിഞ്ഞ ഡിസംബര് വരെ ലഭ്യമായ കണക്കുകള് പ്രകാരം 1,110 കോടി രൂപയാണ് വര്ധന. 415 കമ്ബനികളാണ് ഇന്ഫോപാര്ക്കിലെ വിവിധ കാമ്ബസുകളിലായി പ്രവര്ത്തിക്കുന്നത്. കോവിഡ് കാലത്തു മാത്രം 40 ലേറെ കമ്പനികളാണ് ഇന്ഫോപാര്ക്കില് പുതുതായി പ്രവര്ത്തനം ആരംഭിക്കുകയും ഓഫീസ് തുറക്കുകയും ചെയ്തത്. പുതിയ ഇടം തേടി പല കമ്ബനികളും കാത്തുനില്ക്കുന്നുമുണ്ട്.
18 കമ്പനികള് തങ്ങളുടെ ജീവനക്കാരുടെ എണ്ണം വെട്ടിക്കുറയ്ക്കുകയും പ്രവര്ത്തനം അവസാനിപ്പിക്കുകയും ചെയ്തെങ്കിലും ഇതിലേറെ കമ്ബനികള് പാര്ക്കില് പ്രവര്ത്തനമാരംഭിച്ചു. കൂടുതല് അടിസ്ഥാന സൗകര്യ വികസനവും ഇന്ഫോപാര്ക്കില് അതിവേഗം നടന്നുവരുന്നു. ഈ വര്ഷം അവസാനത്തോടെ ആറു ലക്ഷത്തിലേറെ ചതുരശ്ര അടി കൂടി പുതിയ കമ്പനികള്ക്കായി ഒരുങ്ങുന്നുണ്ട്.
‘ഒരു വെല്ലുവിളിയായി വന്ന കോവിഡ് സാങ്കേതികവിദ്യാ രംഗത്ത് പുതിയ അവസരങ്ങളാണ് തുറന്നുനല്കിയത്. ഐടി രംഗത്ത് പ്രവര്ത്തിക്കുന്ന ഒട്ടേറെ ഐടി ജീവനക്കാര് കേരളത്തിലേക്ക് തിരിച്ചെത്തുന്നുണ്ട്. വര്ക്ക് ഫ്രം ഹോം രീതിയിലും അല്ലാതെയും മലയാളികളായ നിരവധി പേര് ഈ പുതിയ സാഹചര്യത്തില് കേരളത്തെ ഒരു സുരക്ഷിത ഇടമായി കാണുകയും ഇവിടെ തന്നെ ജോലി ചെയ്യാനും താത്പര്യപ്പെടുന്നു. ഇവര്ക്കു വേണ്ടി കേരളത്തിലേക്ക് പ്രവര്ത്തനം വിപുലപ്പെടുത്താന് തയാറായി ബംഗളുരൂ, ചെന്നൈ, മുംബൈ എന്നിവിടങ്ങളിലെ ബഹുരാഷ്ട്ര ഐടി കമ്ബനികള് താത്പര്യം പ്രകടിപ്പിച്ചിട്ടുണ്ട്. ഇത് ഇന്ഫോപാര്ക്ക് ഉള്പ്പെടെ കേരളത്തിലുടനീളമുള്ള ഐടി പാര്ക്കുകള്ക്ക് പുത്തനുണര്വേകും” ഇന്ഫോപാര്ക്ക് സിഇഒ ജോണ് എം. തോമസ് പറഞ്ഞു.
