ന്യൂഡല്ഹി:ഇന്ത്യന് നാഷണല് കോണ്ഗ്രസിനെ നയിക്കാന് അധ്യക്ഷ സ്ഥാനത്തേക്ക് ആരെത്തുമെന്ന് ഒക്ടോബറില് അറിയാം. പ്രസിഡന്റ് തെരഞ്ഞെടുപ്പ് ഒക്ടോബര് 17 ന് നടത്താന് തീരുമാനമായി. കൂടുതല് സ്ഥാനാര്ത്ഥികള് മത്സര രംഗത്തുണ്ടെങ്കില് ഒക്ടോബര് 8 ന് സ്ഥാനാര്ഥി പട്ടിക പ്രസിദ്ധീകരിക്കും. 16 വരെ സ്ഥാനാര്ത്ഥികള്ക്ക് പ്രചാരണം നടത്താം. വോട്ടെണ്ണല് ആവശ്യമെങ്കില് 19 ന് നടത്താനാണ് തീരുമാനം. നേരത്തെസെപ്റ്റംബര് 20 ന് പ്രസിഡന്റ് തെരഞ്ഞെടുപ്പ് നടത്താനായിരുന്നു തീരുമാനം. വിദേശത്തുള്ള സോണിയ ഗാന്ധിയുടെ അദ്ധ്യക്ഷതയില് ഓണ് ലൈനായി ചേര്ന്ന കോണ്ഗ്രസ് പ്രവര്ത്തകസമിതി യോഗത്തിലാണ് തെരഞ്ഞെടുപ്പ് തിയ്യതി നീട്ടി വെക്കാന് തീരുമാനമായത്.
സോണിയാഗാന്ധിക്കൊപ്പം പ്രിയങ്കാ ഗാന്ധി, രാഹുല് ഗാന്ധി എന്നിവരും വിദേശത്ത് നിന്നും യോഗത്തില് ചേര്ന്നു. മറ്റ് ജനറല് സെക്രട്ടറിമാര്, എഐസിസി ആസ്ഥാനത്ത് വെച്ചാണ് യോഗത്തില് പങ്കെടുത്തത്. ഗുലാംനബി ആസാദിന്റെ രാജിയോ രാഹുലിനെതിരായി ആസാദ് അയച്ച കത്തോ യോഗത്തില് ചര്ച്ചക്ക് വന്നില്ല. രാഹുല് ഗാന്ധി അദ്ധ്യക്ഷനാകണമെന്ന് രാജ്യസഭയിലെ പ്രതിപക്ഷ നേതാവ് മല്ലികാര്ജ്ജുന ഖര്ഗെ യോഗത്തിനു മുന്നോടിയായി ആവശ്യപ്പെട്ടിരുന്നു.
അതേ സമയം, രാജസ്ഥാന് മുഖ്യമന്ത്രി അശോക് ഗെലോട്ടിനോട് കോണ്ഗ്രസ് അധ്യക്ഷനാകാന് ഇടക്കാല പ്രസിഡന്റ് സോണിയാ ഗാന്ധി ആവശ്യപ്പെട്ടതായുള്ള റിപ്പോര്ട്ടുകള് നേരത്തെ വന്നിട്ടുണ്ട്.
Monday, January 20, 2025