ടോക്യോ: ഒളിമ്പിക്സ് ഹോക്കിയില് ഇന്ത്യന് വനിതകള് സെമിയിലെത്തി. ഇന്ന് നടന്ന ക്വാര്ട്ടര്ഫൈനല് മത്സരത്തില് ശക്തരായ ഓസ്ട്രേലിയയെ എതിരില്ലാത്ത ഒരു ഗോളിന് പരാജയപ്പെടുത്തിയാണ് ഇന്ത്യ സെമിഫൈനല് യോഗ്യത നേടിയത്. ഇത് ആദ്യമായാണ് ഇന്ത്യന് വനിതകള് ഒളിമ്പിക്സ് ഹോക്കിയുടെ സെമിഫൈനലിലെത്തുന്നത്.
കളിയുടെ 22 ാം മിനിട്ടില് ഗുര്ജിത്ത് കൗര് നേടിയ ഗോളിലൂടെയാണ് ഇന്ത്യന് വനിതകള് ലീഡ് നേടുന്നത്. അതിനു ശേഷം ഓസ്ട്രേലിയ തുടരേ തുടരേ ആക്രമണം അഴിച്ചു വിട്ടെങ്കിലും ഇന്ത്യന് പ്രതിരോധവും ഗോള്കീപ്പര് സവിതയും ഉരുക്കുപോലെ നിന്നു. അവസാന നിമിഷങ്ങളില് ഓസ്ട്രേലിയ അടുപ്പിച്ച് നിരവധി പെനാല്ട്ടി കോര്ണറുകള് സ്വന്തമാക്കിയെങ്കിലും ഒരെണ്ണം പോലും ലക്ഷ്യത്തിലെത്തിക്കാന് അവര്ക്ക് സാധിച്ചില്ല.
ഇതിനു മുമ്പത്തെ ഇന്ത്യന് വനിതകളുടെ ഒളിമ്പിക്സിലെ ഏറ്റവും മികച്ച പ്രകടനം വന്നത് 1980ലെ ഒളിമ്പിക്സിലാണ്. അന്ന് ആറു ടീമുകള് പങ്കെടുത്ത റൗണ്ട് റോബിന് പോരാട്ടത്തില് ഇന്ത്യ നാലാമതായി ഫിനിഷ് ചെയ്തു. 1980നു ശേഷം 2016ല് മാത്രമാണ് ഇന്ത്യന് വനിതകള് രണ്ടാമതൊരു ഒളിമ്പിക്സിന് യോഗ്യത നേടുന്നത്. ഇത് ഇന്ത്യന് വനിതകളുടെ മൂന്നാമത്തെ ഒളിമ്പിക്സ് മാത്രമാണ്.
Friday, January 24, 2025
