ചെന്നൈ: മകനും മന്ത്രിസഭാ അംഗവുമായ ഉദയനിധി സ്റ്റാലിന്റെ സനാതന ധര്മ്മം സംബന്ധിച്ച പ്രസ്താവനയില് നിലപാട് വ്യക്തമാക്കി തമിഴ്നാട് മുഖ്യമന്ത്രി എം.കെ.സ്റ്റാലിന്. ഉദയനിധി എന്താണ് പറഞ്ഞതെന്ന് മനസിലാക്കാതെ പ്രധാനമന്ത്രി പ്രതികരിച്ചത് ശരിയായില്ലെന്നും എം. കെ. സ്റ്റാലിന് പ്രതികരിച്ചു.
ഏത് റിപ്പോര്ട്ടും ശരിയാണോയെന്ന് പരിശോധിക്കാനുള്ള എല്ലാവിധ സാധ്യതകളും പ്രധാനമന്ത്രിക്കുണ്ടെന്ന് ചൂണ്ടിക്കാണിച്ച സ്റ്റാലിന് ഉദയനിധിയെക്കുറിച്ച് പ്രചരിക്കുന്ന നുണകളെക്കുറിച്ച് പ്രധാനമന്ത്രി അറിയാതെയാണോ സംസാരിക്കുന്നത്, അതോ അറിഞ്ഞുകൊണ്ട് അങ്ങനെ ചെയ്യുന്നതാണോ എന്നും ചോദിച്ചു.
ഏതെങ്കിലും മതത്തേയോ മത വികാരത്തേയോ വ്രണപ്പെടുത്താന് ഉള്ളതല്ല പ്രസ്താവന. പട്ടികജാതി – ഗോത്രവര്ഗ വിഭാഗങ്ങള്, സ്ത്രീകള് എന്നിവര്ക്ക് നേരെയുള്ള വിവേചനങ്ങള്ക്ക് എതിരെയാണ് പ്രസ്താവനയെന്നും സ്റ്റാലിന് ചൂണ്ടിക്കാണിച്ചു. അടിച്ചമര്ത്തുന്ന പ്രത്യയശാസ്ത്രത്തിനെതിരായ നിലപാട് ബി.ജെ.പിക്ക് മനസിലാക്കാന് സാധിച്ചില്ല. വംശഹത്യ എന്ന വാക്ക് ഉദയനിധി ഇംഗ്ലീഷിലോ തമിഴിലോ എവിടെയും ഉപയോഗിച്ചിട്ടില്ലെന്നും അദ്ദേഹം ചൂണ്ടിക്കാണിച്ചു.