ദോഹ : ഖത്തര് ലോകകപ്പിലെ ഫൈനല് മത്സരത്തിന് ശേഷം ലോകകപ്പ് മത്സരങ്ങളില് നിന്ന് വിരമിക്കുമെന്ന് ലയണല് മെസി. സെമിഫൈനലില് ക്രൊയേഷ്യക്കെതിരെ പെനാല്റ്റിയില് നിന്ന് ഗോള് നേടുകയും ജൂലിയന് അല്വാരസ് നേടിയ മറ്റ് രണ്ട് ഗോളുകള്ക്ക് വഴിയൊരുക്കുകയും ചെയ്ത ശേഷമാണ് അര്ജന്റീന ക്യാപ്റ്റന് ഇക്കാര്യം പറഞ്ഞത്.’ലോകകപ്പിലെ എന്റെ യാത്ര ഒരു ഫൈനലില് അവസാനിപ്പിക്കാനായതില് ഞാന് വളരെ സന്തുഷ്ടനാണ്. അത് ശരിക്കും സന്തോഷകരമാണ്. അടുത്ത ലോകകപ്പിനായി ഒരുപാട് വര്ഷങ്ങളുണ്ട്. എനിക്കത് ചെയ്യാനാകുമെന്ന് തോന്നുന്നില്ല. ഈ രീതിയില് അവസാനിപ്പിക്കുന്നതാണ് നല്ലത്’ മെസി പറഞ്ഞു.ക്രൊയേഷ്യയുമായുള്ള സെമിഫൈനല് മത്സരത്തോടെ ലോകകപ്പില് അര്ജന്റീനയുടെ എക്കാലത്തെയും മികച്ച ഗോള്വേട്ടക്കാരനായി ലയണല് മെസി. ക്രൊയേഷ്യക്കെതിരായി സെമിയില് ലക്ഷ്യം കണ്ടതോടെ അര്ജന്റീന കുപ്പായത്തില് 11 ഗോളായി മെസിക്ക്. ഗബ്രിയേല് ബാറ്റിസ്റ്റ്യൂട്ടയെ (10) മറികടന്നു. മത്സരത്തില് മറ്റൊരു റെക്കോഡും മുപ്പത്തഞ്ചുകാരന് കുറിച്ചു. ലോകകപ്പില് ഏറ്റവും കൂടുതല് മത്സരം കളിക്കുന്ന താരമെന്ന ജര്മന് ഇതിഹാസം ലോതര് മതേവൂസിന്റെ നേട്ടത്തിനൊപ്പമെത്തി. ഇരുവരും 25 കളിയിലിറങ്ങി.
