മുംബൈ: പാരസെറ്റമോള്, അസിത്രോമൈസിന് തുടങ്ങിയ അവശ്യമരുന്നുകളുടെ വില ഏപ്രില് ഒന്നു മുതല് വര്ദ്ധിക്കുമെന്ന് വ്യക്തമാക്കി നാഷണല് ഫാര്മസ്യൂട്ടിക്കല് പ്രൈസിംഗ് അതോറിറ്റി (എന്പിപിഎ). വേദനസംഹാരികള്, ആന്റിബയോട്ടിക്കുകള്, പകര്ച്ചവ്യാധികള് തടയുന്നതിനുള്ള മരുന്നുകള് എന്നിവയുടെ വില വര്ദ്ധിക്കും.
മരുന്ന് വില കഴിഞ്ഞ വര്ഷം 12 ശതമാനവും 2022ല് 10 ശതമാനവും വര്ധിപ്പിച്ചതിന് പിന്നാലെയാണ് ഈ വില വര്ധന. 2022-ലെ 2023-ലെ കലണ്ടര് വര്ഷത്തിലെ മൊത്തവില സൂചികയിലെ മാറ്റത്തിന് അനുസൃതമായിരിക്കും വില വര്ധന. 2024 മാര്ച്ച് 27 ലെ അറിയിപ്പ് പ്രകാരം, മൊത്തവില സൂചിക അടിസ്ഥാനമാക്കി നിര്മ്മാതാക്കള്ക്ക് എംആര്പി വര്ദ്ധിപ്പിക്കാം, ഇതിന് സര്ക്കാരില് നിന്ന് മുന്കൂര് അനുമതി ആവശ്യമില്ല.
പാരസെറ്റമോള്, അസിത്രോമൈസിന്, വിറ്റാമിനുകള്, കോവിഡ്-19 അണുബാധയെ ചികിത്സിക്കുന്നതിനുള്ള ചില മരുന്നുകള്, സ്റ്റിറോയിഡുകള് എന്നിവയുള്പ്പെടെ 800-ലധികം മരുന്നുകളുടെ വില വര്ദ്ധിക്കും. അമോക്സിസില്ലിന്, ആംഫോട്ടെറിസിന് ബി, ബെന്സോയില് പെറോക്സൈഡ്, സെഫാഡ്രോക്സിന്, സെറ്റിറൈസിന്, ഡെക്സമെതസോണ്, ഫ്ലൂക്കോണസോള്, ഫോളിക് ആസിഡ്, ഹെപ്പാരിന്, ഇബുപ്രോഫെന് തുടങ്ങിയ നിര്ണായക മരുന്നുകള് പട്ടികയില് ഉള്പ്പെടുന്നു
Wednesday, January 22, 2025