എംബാപ്പെയ്ക്കു മൂന്നു മത്സരങ്ങളില്‍ വിലക്ക്

mbappe

പാരീസ്: പാരീ സാന്‍ ഷെര്‍മയിന്‍ താരം കൈലിയന്‍ എംബാപ്പെയ്ക്കു മൂന്നു ഫ്രഞ്ച് ലീഗ് വണ്‍ മത്സരങ്ങളില്‍നിന്നു വിലക്ക്. കഴിഞ്ഞയാഴ്ച നിമെസിനെതിരേയുള്ള മത്സരത്തില്‍ ചുവപ്പ് കാര്‍ഡ് സംഭവത്തെത്തുടര്‍ന്നാണ് എംബാപ്പെയ്ക്കു വിലക്കുവന്നത്. പത്തൊമ്പതുകാരനായ താരം ഫ്രാന്‍സിന്റെ ലോകകപ്പ് നേടിയ ടീമില്‍ അംഗമായിരുന്നു. ലോകകപ്പിലെ മികച്ച യുവതാരത്തിനുള്ള പുരസ്‌കാരവും എംബാപ്പെയ്ക്കായിരുന്നു. നിമെസിനെതിരേ 4-2ന് പിഎസ്ജി ജയിച്ച മത്സരത്തില്‍ യുവതാരം ഗോള്‍ നേടിയിരുന്നു. കളിയുടെ അവസാന മിനിറ്റുകളില്‍ പന്തുമായി മുന്നേറിയ എംബാപ്പെയെ തെജി സാവനിര്‍ ഫൗള്‍ ചെയ്തു വീഴ്ത്തിയിരുന്നു. ഇതില്‍ പ്രകോപിതനായി താരം എഴുന്നേറ്റ് വന്ന് നിമെസ് മിഡ്ഫീല്‍ഡറെ തള്ളി താഴെയിട്ടു. ഇതോടെ റഫറി ഇരുവര്‍ക്കും ചുവപ്പ് കാര്‍ഡ് നല്‍കി. സാവനീര്‍ക്ക് അഞ്ചു കളിയിലാണ് വിലക്ക്. 14ന് സാന്‍ എറ്റിനെയ്‌ക്കെതിരേയും 23ന് റെനേസിനെതിരേയും 26ന് റിംസിനെതിരേയുമുള്ള മത്സരങ്ങളാണ് എംബാപ്പെയ്ക്കു നഷ്ടമാകുക.