Author Archives: admin

ബാര്‍ക്കോഴക്കേസില്‍ തുടരന്വേഷണം വേണമെന്ന് കോടതി

km-mani

തിരുവനന്തപുരം: ബാര്‍ക്കോഴ കേസില്‍ മുന്‍ ധനമന്ത്രി കെ.എം.മാണിയെ കുറ്റവിമുക്തനാക്കി കൊണ്ടുള്ള ഹര്‍ജി കോടതി തള്ളി. മാണിക്കെതിരേ തെളിവില്ലെന്ന് വ്യക്തമാക്കി അന്വേഷണ സംഘം സമര്‍പ്പിച്ച റിപ്പോര്‍ട്ടാണ് തിരുവനന്തപുരം വിജിലന്‍സ് കോടതി തള്ളിയിരിക്കുന്നത്.
കേസില്‍ തുടര്‍ നടപടികള്‍ സ്വീകരിക്കാന്‍ സര്‍ക്കാരിന്റെ അനുമതി വാങ്ങാന്‍ കോടതി വിജിലന്‍സിനെ ചുമതലപ്പെടുത്തുകയും ചെയ്തു. ഡിസംബര്‍ 10ന് മുന്‍പ് സര്‍ക്കാര്‍ അനുമതി വാങ്ങാനാണ് വിജിലന്‍സിനോട് കോടതി ആവശ്യപ്പെട്ടിരിക്കുന്നത്.
മാണി കോഴ വാങ്ങിയതിന് തെളിവില്ലെന്നായിരുന്നു വിജിലന്‍സ് അന്വേഷണത്തിലെ കണ്ടെത്തല്‍. കേസില്‍ തുടര്‍ നടപടിക്ക് സര്‍ക്കാര്‍ അനുമതി നല്‍കിയാല്‍ പുനരന്വേഷണം ഉണ്ടാകും. അങ്ങനെ വന്നാല്‍ സമീപ ഭാവിയിലൊന്നും കെ.എം.മാണിക്ക് ബാര്‍ക്കോഴ കേസില്‍ നിന്നും മുക്തനാകാന്‍ കഴിയാതെ വരും. ഉമ്മന്‍ ചാണ്ടി സര്‍ക്കാരിന്റെ കാലത്ത് പൂട്ടിക്കിടക്കുന്ന ബാറുകള്‍ തുറക്കാന്‍ ഒരുകോടി രൂപ മാണി കോഴവാങ്ങിയെന്ന് ബാറുടമ ബിജു രമേശിന്റെ ആരോപണമാണ് കേസിനാസ്പദമായ സംഭവം. തുടര്‍ന്നാണ് ആരോപണത്തെക്കുറിച്ച് അന്വേഷണം നടന്നത്‌

പാകിസ്ഥാനുമായി ചര്‍ച്ച: പഞ്ചാബ് മന്ത്രി  സിദ്ദുവിനെ സുഷമ ശാസിച്ചെന്ന് കേന്ദ്രമന്ത്രി

sushma sidhu

ന്യൂഡല്‍ഹി: കര്‍ത്താര്‍പൂര്‍ സാഹിബ് ഇടനാഴിയുമായി ബന്ധപ്പെട്ട ചര്‍ച്ചകള്‍ തുടങ്ങുന്നതിന് സഹായിക്കണമെന്ന് ആവശ്യപ്പെട്ട് തന്നെ കാണാനെത്തിയ പഞ്ചാബ് മന്ത്രിയും മുന്‍ ക്രിക്കറ്റ് താരവുമായ നവജ്യോത് സിംഗ് സിദ്ദുവിനെ കേന്ദ്ര വിദേശകാര്യമന്ത്രി സുഷമാ സ്വരാജ് ശാസിച്ചു. ഇന്നലെ നടന്ന സംഭവം കേന്ദ്ര മന്ത്രിയും അകാലിദള്‍ നേതാവുമായ ഹര്‍സിമ്രത് കൗര്‍ ബാദലാണ് പുറത്തുവിട്ടത്.
സിഖ് മതസ്ഥാപകനായ ഗുരുനാനാക്ക് തന്റെ അവസാനകാലം ചെലവഴിച്ച കര്‍ത്താര്‍പൂര്‍ ഗുരുദ്വാരയിലേക്കുള്ള ഇടനാഴിയുടെ നിര്‍മാണവുമായി ബന്ധപ്പെട്ട് പാകിസ്ഥാനുമായി ചര്‍ച്ച നടത്തണമെന്ന് ആവശ്യപ്പെട്ടാണ് സിദ്ദു സുഷമയെ കണ്ടത്. എന്നാല്‍, സുഷമ മന്ത്രിയെ ശാസിക്കുകയായിരുന്നെന്നാണ് ബാദല്‍ പറയുന്നത്. പ്രശ്‌നത്തില്‍ അനാവശ്യമായി ഇടപെടാനാണ് സിദ്ദു ശ്രമിച്ചത്. പാകിസ്ഥാനില്‍ സ്വകാര്യ സന്ദര്‍ശനം നടത്താന്‍ നല്‍കിയ അനുമതി സിദ്ദു ദുരുപയോഗം ചെയ്‌തെന്നും ഇന്ത്യന്‍ സൈനികരെ കൊലപ്പെടുത്തിയ പാക് സൈന്യത്തിന്റെ മേധാവിയെ ആശ്‌ളേഷിച്ചതും ഉചിതമായില്ലെന്നും സുഷമ പറഞ്ഞതായി ബാദല്‍ മാധ്യമങ്ങളോട് പറഞ്ഞു. സിദ്ദുവിനൊപ്പം മുന്‍ എം.പിയായ മുതിര്‍ന്ന ഒരു കോണ്‍ഗ്രസ് നേതാവും ഒപ്പമുണ്ടായിരുന്നു.സിക്ക് തീര്‍ത്ഥാടകര്‍ക്ക് കര്‍ത്താര്‍പൂര്‍ ഗുരുദ്വാരയിലേക്ക് വിസയില്ലാതെ പ്രവേശനം നല്‍കുമെന്ന് പാകിസ്ഥാന്‍ ഇന്‍ഫര്‍മേഷന്‍ മന്ത്രി ഫവാദ് ചൗധരി അടുത്തിടെ പറഞ്ഞിരുന്നു. ഇതിനായി പ്രത്യേക റോഡ് നിര്‍മിക്കുമെന്നും അദ്ദേഹം വ്യക്തമാക്കിയിരുന്നു.

കണ്ണൂര്‍ എയര്‍പോര്‍ട്ട്: നിക്ഷേപ സാദ്ധ്യതകള്‍ക്ക് വാതില്‍ തുറന്ന് സഹകരണ സെമിനാര്‍

kannur airport

കണ്ണൂര്‍: കണ്ണൂര്‍ അന്താരാഷ്ട്രവിമാനത്താവളവുമായി ബന്ധപ്പെട്ട നിക്ഷേപ സാദ്ധ്യതകളെ ഉപയോഗപ്പെടുത്താനുള്ള വഴി തേടി സഹകരണ മേഖല. ഇന്‍സ്റ്റിറ്റ്യൂട്ട് ഓഫ് കോ ഓപ്പറേറ്റീവ് മാനേജ്‌മെന്റും കണ്ണൂര്‍ ജില്ല ബാങ്കും സംയുക്തമായി സംഘടിപ്പിച്ച സെമിനാറില്‍ ക്രിയാത്മകചര്‍ച്ചകളും നിര്‍ദേശങ്ങളും ഉയര്‍ന്നുവന്നു. കണ്ണൂര്‍ ജില്ല ബാങ്ക് ഹാളില്‍ മന്ത്രി രാമചന്ദ്രന്‍ കടന്നപ്പള്ളി സെമിനാര്‍ ഉദ്ഘാടനം ചെയ്തു. കേരളത്തിലെ സഹകരണമേഖലയ്ക്ക് ചെയ്യാന്‍ കഴിയാത്തതായി ഒന്നുമില്ലെന്നും വിമാനത്താവളത്തിന്റെ സാദ്ധ്യതകള്‍ ഉപയോഗപ്പെടുത്താന്‍ ഒട്ടേറെ മേഖലകളുണ്ടെന്നും മന്ത്രി പറഞ്ഞു. എങ്ങിനെ നിക്ഷേപം നടത്താമെന്ന് വിദഗ്ധരടക്കമുള്ളവരെ ഉപയോഗപ്പെടുത്തി സഹകരണസ്ഥാപനങ്ങളോരോന്നും സമഗ്ര ചര്‍ച്ച നടത്തണമെന്ന് അദ്ധ്യക്ഷനായ ജയിംസ് മാത്യു എം.എല്‍. എ നിര്‍ദേശിച്ചു. ഓരോ സംഘങ്ങളും മറ്റാരും കാണാത്ത സാദ്ധ്യതകള്‍ കണ്ടെത്തിയാല്‍ മാത്രമേ വിജയത്തിലെത്തുകയുള്ളൂ. വിവിധ സെക്ടറുകളിലെ നിക്ഷേപ സാദ്ധ്യത കണ്ടെത്തി നല്‍കാന്‍ കോ ഓപ്പറേറ്റീവ് ഇന്‍സ്റ്റിറ്റ്യൂട്ട് മുന്‍കൈ എടുക്കണം.എട്ടുനദികള്‍ ചേര്‍ന്നുള്ള മലബാര്‍ മലനാട് ക്രൂയിസ് പദ്ധതിയില്‍ സഹകരണമേഖലയ്ക്ക് വന്‍ സാദ്ധ്യതയുണ്ടെന്നും എം.എല്‍.എ പറഞ്ഞു. അഡ്വ. സണ്ണിജോസഫ് എം.എല്‍.എ, നബാര്‍ഡ് ഡി.ഡി.എം കെ.വി മനോജ് കുമാര്‍, വയനാട് ജോ. രജിസ്ട്രാര്‍ പി. റഹീം, വ്യവസായ കേന്ദ്രം ജനറല്‍ മാനേജര്‍ ടി. അബ്ദുള്‍വഹാബ്, ഐ.സി.എം ഡയരക്ടര്‍ എം.വി ശശികുമാര്‍ എന്നിവര്‍ പ്രസംഗിച്ചു. കണ്ണൂര്‍ ജോയിന്റ് രജിസ്ട്രാര്‍ ജെ. വിജയകുമാര്‍ സ്വാഗതവും ജില്ല ബാങ്ക് ജനറല്‍ മാനേജര്‍ കെ.പുരുഷോത്തമന്‍ നന്ദിയും പറഞ്ഞു.

ഉന്നതവിദ്യാഭ്യാസരംഗം പൊളിച്ചെഴുതണം: സ്പീക്കര്‍

P_sree_ramakrishnan

കോഴിക്കോട്: സര്‍ക്കാര്‍ സ്‌കൂളുകളെക്കുറിച്ചും വിദ്യാഭ്യാസ രീതികളെക്കുറിച്ചുമുള്ള പൊതുധാരണകളെ തകര്‍ക്കുന്ന കരുത്തുറ്റ സാമാന്യ വിദ്യാഭ്യാസമാണ് ആവശ്യമെന്ന് സ്പീക്കര്‍ പി. ശ്രീരാമകൃഷ്ണന്‍ പറഞ്ഞു. ഉന്നത വിദ്യാഭ്യാസം അടിമുടി പൊളിച്ചെഴുതണമെന്നും അദ്ദേഹം അഭിപ്രായപ്പെട്ടു. കോവൂരില്‍ ഗവ എച്ച്.എസ്.എസ് മെഡിക്കല്‍ കോളേജ് ക്യാമ്പസില്‍ പ്രിസം പദ്ധതിയില്‍ നടപ്പാക്കുന്ന മള്‍ട്ടി പര്‍പ്പസ് കോംപ്ലക്‌സ് ശിലാസ്ഥാപനം നിര്‍വഹിക്കുകയായിരുന്നു സ്പീക്കര്‍.
സര്‍ക്കാര്‍ ഏറ്റവും കൂടുതല്‍ നിക്ഷേപം നടത്തുന്നത് വിദ്യാഭ്യാസ മേഖലയിലാണ്, എന്നാല്‍ നിക്ഷേപിക്കുന്നതിന് തുല്യമായ ഫലം കിട്ടുന്നില്ലെന്ന അവസ്ഥയുണ്ട്. ഇതിനായി സാമാന്യവിദ്യാഭ്യാസം കഴിഞ്ഞിറങ്ങുന്ന വിദ്യാര്‍ത്ഥികള്‍ മികച്ച ഉന്നതവിദ്യാഭ്യാസ സൗകര്യവും ലഭ്യമാക്കേണ്ടതുണ്ട്. യുവാക്കള്‍ സമൂഹമാധ്യമങ്ങളില്‍ സമയം പോക്കുന്നവരാണെന്ന ആക്ഷേപമാണ് നിലനിന്നിരുന്നത്. എന്നാല്‍ യുവത്വത്തെക്കുറിച്ചുള്ള തെറ്റിദ്ധാരണ മാറ്റിയ സന്ദര്‍ഭമാണ് ഇക്കഴിഞ്ഞ പ്രളയകാലത്തുണ്ടായത്. സമൂഹമാധ്യമങ്ങളെ സര്‍ക്കാര്‍ സംവിധാനങ്ങള്‍ക്കൊപ്പം തന്നെ മികച്ച കണ്‍ട്രോള്‍ റൂമുകളാക്കി സജീവമായി പ്രവര്‍ത്തിപ്പിക്കാന്‍ യുവാക്കള്‍ക്ക് കഴിഞ്ഞിട്ടുണ്ട്.
അടിസ്ഥാന സൗകര്യം ഒരുക്കിയത് കൊണ്ട് മാത്രം അന്താരാഷ്ട്ര നിലവാരം നേടി എന്ന് പറയാനാകില്ലെന്ന് ചടങ്ങില്‍ അദ്ധ്യക്ഷത വഹിച്ച എ. പ്രദീപ് കുമാര്‍ എം.എല്‍.എ പറഞ്ഞു.
അന്താരാഷ്ട്ര തലത്തിലുള്ള വിദ്യാഭ്യാസ സ്ഥാപനങ്ങളില്‍ പഠിച്ചിറങ്ങിയ കുട്ടികളുമായി നമ്മുടെ കുട്ടികള്‍ക്ക് മത്സരിക്കാനാകണം. എല്ലാവരെയും മുഴുവന്‍ എ പ്ലസ് നേടുന്നവര്‍ ആക്കുകയല്ല മറിച്ച് വിദ്യാര്‍ത്ഥികളിലെ കഴിവുകള്‍ കണ്ടെത്തി പരിപോഷിപ്പിക്കാനാണ് ശ്രമിക്കേണ്ടതെന്നും അതാണ് പ്രിസം മുന്നോട്ട് വെക്കുന്ന ആശയമെന്നും എം.എല്‍.എ പറഞ്ഞു. മണ്ഡലത്തിലെ പത്ത് സ്‌കൂളുകള്‍ മികവിന്റെ കാര്യത്തില്‍ പൂര്‍ണതയില്‍ എത്തിക്കുമെന്നും അതിനായുള്ള ഫണ്ട് ലഭ്യമാക്കിയതായും എം.എല്‍.എ അറിയിച്ചു.

സഹകരണ മേഖലയെ ഇല്ലാതാക്കാന്‍ കേന്ദ്ര സര്‍ക്കാര്‍ ശ്രമം: എം.എം മണി

MMMani_

രാജാക്കാട്: സഹകരണ മേഖലയെ ഇല്ലാതാക്കുകയെന്ന ലക്ഷ്യത്തോടെയാണ് പല നിയമ നടപടികളും കേന്ദ്ര സര്‍ക്കാര്‍ സ്വീകരിക്കുന്നതെന്നും, കേന്ദ്ര സര്‍ക്കാരിന് സഹകരണ മേഖല വേണമെന്നില്ലെന്നും കുത്തക ബാങ്കുകള്‍ മതിയെന്നാണെന്നും മന്ത്രി എം.എം മണി.
രാജാക്കാട് സര്‍വ്വീസ് സഹകരണ ബാങ്കിന്റെ എന്‍.ആര്‍ സിറ്റി ശാഖ ഉദ്ഘാടനം ചെയ്ത് ആദ്യ നിക്ഷേപം ഏറ്റുവാങ്ങി സംസാരിക്കുകയായിരുന്നു അദ്ദേഹം. കേരളാ ബാങ്ക് രൂപീകരിക്കുകയെന്ന ലക്ഷ്യമാണ് സര്‍ക്കാരിനുള്ളത്. റിസര്‍വ്വ് ബാങ്കിന്റെ അംഗീകാരം ലഭിക്കുന്നതിനുള്ള നടപടികള്‍ നടന്നുവരികയാണെന്നും മന്ത്രി കൂട്ടി ചേര്‍ത്തു. ബാങ്ക് പ്രസിഡന്റ് ടി.എം കമലം അദ്ധ്യക്ഷത വഹിച്ചു. വൈസ് പ്രസിഡന്റ് ടി.എസ് ബാബു സ്വാഗതം ആശംസിച്ചു. സെക്രട്ടറി മോണ്‍സി കുര്യന്‍ റിപ്പോര്‍ട്ട് അവതരിപ്പിച്ചു. ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യ പൗലോസ് കംപ്യൂട്ടര്‍ ഉദ്ഘാടനം നിര്‍വ്വഹിച്ചു. പഞ്ചായത്ത് പ്രസിഡന്റ് എം.എസ് സതി ആദ്യ വായ്പ വിതരണവും, സഹകരണ സംഘം ജോയിന്റ് രജിസ്ട്രാര്‍ എസ്.ഷേര്‍ലി സ്വര്‍ണ്ണ പണയ ഉദ്ഘാടനവും നിര്‍വ്വഹിച്ചു. എസ്.എസ്.എല്‍.സി എ പ്ലസ് ജേതാക്കളെ പഞ്ചായത്ത് വൈസ് പ്രസിഡന്റ് കെ.പി അനിലും, പ്ലസ് ടു വിദ്യാര്‍ത്ഥികളെ ബ്ലോക്ക് പഞ്ചായത്ത് മെമ്ബര്‍ രാധമണി പുഷ്പജനും ട്രോഫികള്‍ നല്‍കി ആദരിച്ചു.
ഡയറക്ടര്‍ ബോര്‍ഡ് അംഗങ്ങള്‍,മുന്‍ ബാങ്ക് പ്രസിഡന്റുമാര്‍, സെക്രട്ടറിമാര്‍ എന്നിവരെ ആദരിച്ചു. എ.ഡി സന്തോഷ്, ഇന്ദിര സരേന്ദ്രന്‍, ബിജി സന്തോഷ്, വി.എ കുഞ്ഞുമോന്‍, എം.എന്‍ ഹരിക്കുട്ടന്‍, ആര്‍.ബാലന്‍ പിള്ള, എന്‍.ജെ ചാക്കോ, പി.എസ് സനില്‍, സിബി കൊച്ചുവളളാട്ട്, സി.കെ വിജയന്‍, ഒ.ജി മദനന്‍, വി.എം സെബാസ്റ്റ്യന്‍, പി.സി രവികുമാര്‍ എന്നിവര്‍ പ്രസംഗിച്ചു.

സന്ദര്‍ശകര്‍ എത്തിത്തുടങ്ങി, എടക്കല്‍ വിനോദസഞ്ചാരകേന്ദ്രം വീണ്ടും സജീവമായി

edakkal

കല്‍പ്പറ്റ:ഗുഹാമുഖത്ത് പാറക്കെട്ട് ഇടിഞ്ഞതിനെത്തുടര്‍ന്നു എര്‍പ്പെടുത്തിയ ടൂറിസം നിരോധനം നീക്കിയതോടെ എടക്കല്‍ റോക്ക് ഷെല്‍ട്ടറില്‍ സന്ദര്‍ശകര്‍ എത്തിത്തുടങ്ങി. എടക്കലില്‍ കഴിഞ്ഞ 23നു നിര്‍ത്തിവച്ച ടൂറിസം പ്രവര്‍ത്തനങ്ങള്‍ നിയന്ത്രണങ്ങളോടെ ഞായറാഴ്ചയാണ് പുനരാരംഭിച്ചത്. പാറക്കെട്ട് ഇടിഞ്ഞ ഒന്നാം ഗുഹ ഒഴിവാക്കി സെക്കന്‍ഡ് പാത്തിലൂടെ ശിലാചിത്രങ്ങളുള്ള രണ്ടാം ഗുഹയില്‍ സന്ദര്‍ശനം നടത്തി അതേ വഴിയിലൂടെ സഞ്ചാരികള്‍ തിരിച്ചുവരുന്ന വിധത്തിലാണ് ടൂറിസം ക്രമീകരണം. രാവിലെ എട്ടു മുതല്‍ വൈകുന്നേരം നാലുവരെയാണ് സന്ദര്‍ശകരെ അനുവദിക്കുക. പരമാവധി 30 പേരടങ്ങുന്ന ചെറുസംഘങ്ങളായാണ് സഞ്ചാരികളെ ഷെല്‍ട്ടറിലേക്കു കടത്തിവിടുക. ഒരേസമയം ഗുഹയില്‍ 30ല്‍ അധികം പേര്‍ ഉണ്ടാകില്ല. പുതിയ ക്രമീകരണമനുസരിച്ച് പ്രവേശനപാതയില്‍ മൂന്നിടങ്ങളില്‍ തങ്ങിയതിനുശേഷമായിരിക്കും രണ്ടാം ഗുഹയില്‍ സന്ദര്‍ശകര്‍ക്ക് പ്രവേശനം.
ഓഗസ്റ്റ് 23ന് രാവിലെ ജീവനക്കാരുടെ പതിവു പരിശോധയിലാണ് ഒന്നാം ഗുഹയുടെ പ്രവേശനകവാടത്തിനു പുറത്തു കല്ല് വീണതും തറയില്‍ നേരിയ വിള്ളല്‍ വീണതും ശ്രദ്ധയില്‍പ്പെട്ടത്. ഇതേത്തുടര്‍ന്ന് മാനന്തവാടി പഴശികുടീരം മാനേജര്‍ അയച്ച ഇമെയില്‍ സന്ദേശത്തിന്റെ അടിസ്ഥാനത്തിലാണ് വിനോദസഞ്ചാരം താത്കാലികമായി വിലക്കിയത്. ഇതിനു പിന്നാലെ പുരാവസ്തു മന്ത്രി കടന്നപ്പള്ളി രാമചന്ദ്രനും പ്രിന്‍സിപ്പല്‍ സെക്രട്ടറിയും എടക്കലില്‍ സന്ദര്‍ശനം നടത്തി.
സംസ്ഥാനത്തെ ഏറ്റവും പ്രധാന്യമുള്ള ചരിത്രാതീതകാല സ്മാരകമാണ് എടക്കല്‍ റോക്ക് ഷെല്‍ട്ടര്‍. പൈതൃക വിനോദസഞ്ചാര മേഖലയില്‍ ലോകപ്രശസ്തമാണ് എടക്കല്‍. ഷെല്‍ട്ടറും അതിലെ ശിലാചിത്രങ്ങളും വിലമതിക്കാനാകാത്ത സമ്ബത്താണ്. 1984ല്‍ സംസ്ഥാന പുരാവസ്തു വകുപ്പ് ചരിത്രസ്മാരകമായി പ്രഖ്യാപിച്ച എടക്കലില്‍ ജില്ലാ ടൂറിസം പ്രമോഷന്‍ കൗണ്‍സിലിന്റെ നിയന്ത്രണത്തിലാണ് വിനോദസഞ്ചാരം. 2009 ഡിസംബര്‍ ഒന്ന് മുതല്‍ ബത്തേരി എം.എല്‍.എ ചെയര്‍മാനും ഡി.ടി.പി.സി സെക്രട്ടറി ചീഫ് എക്‌സിക്യുട്ടീവ് ഓഫീസറുമായ ഡെസ്റ്റിനേഷന്‍ മാനേജ്‌മെന്റ് കമ്മിറ്റിയാണ് ഭരണച്ചുമതല വഹിക്കുന്നത്. കാലവര്‍ഷക്കെടുതികളുടെ പശ്ചാത്തലത്തില്‍ ചെറുകിട സംരംഭകരടക്കം നേരിടുന്ന വിഷമതകളും ജില്ലാ ഭരണകൂടത്തിന്റെ റിപ്പോര്‍ട്ടും കണക്കിലെടുത്താണ് എടക്കലില്‍ സന്ദര്‍ശകരെ അനുവദിക്കാനുള്ള തീരുമാനമെന്നാണ് മന്ത്രി രാമചന്ദ്രന്‍ കടന്നപ്പള്ളിയും ടൂറിസം പ്രിന്‍സിപ്പല്‍ സെക്രട്ടറി ഡോ.വി. വേണു എന്നിവര്‍ കഴിഞ്ഞ ദിവസം അറിയിച്ചത്. എടക്കല്‍ റോക്ക് ഷെല്‍ട്ടറിന്റെ സംരക്ഷണം ആര്‍ക്കിയോളജിക്കല്‍ സര്‍വേ ഓഫ് ഇന്ത്യയെ ഏല്‍പ്പിക്കേണ്ട സാഹചര്യമില്ലെന്നും അവര്‍ അഭിപ്രായപെട്ടു.റോക്ക് ഷെല്‍ട്ടറിന്റെ വാഹകശേഷി ശാസ്ത്രീയമായി നിര്‍ണയിക്കുന്നതിന് വിദഗ്ധ സമിതിയെ വൈകാതെ നിയോഗിക്കാന്‍ തീരുമാനമായിട്ടുണ്ട്. പുരാവസ്തു, ജിയോളജി, സോയില്‍ കണ്‍സര്‍വേഷന്‍ വകുപ്പ് പ്രതിനിധികളും ഉള്‍പ്പെടുന്നതായിരിക്കും വിദഗ്ധ സമിതി.

മാണിക്ക് നിരപരാധിത്വം തെളിയിക്കാനുള്ള അവസരം: കെ.മുരളീധരന്‍

muralidharan-k

തിരുവനന്തപുരം: ബാര്‍ക്കോഴ കേസിലെ കോടതി വിധി കെ.എം.മാണിക്ക് നിരപരാധിത്വം തെളിയിക്കാനുള്ള അവസരമായിട്ടാണ് കണക്കാക്കുന്നതെന്ന് കെ.മുരളീധരന്‍ എംഎല്‍എ. ഈ കോടതി വിധികൊണ്ടൊന്നും മാണിയെ തള്ളിപ്പറയാന്‍ യുഡിഎഫ് തയാറാകില്ല. അദ്ദേഹം യുഡിഎഫിന്റെ അവിഭാജ്യഘടകമാണെന്നും തങ്ങളുടെ സഹപ്രവര്‍ത്തകനാണെന്നും മുരളീധരന്‍ അഭിപ്രായപ്പെട്ടു.

രവി ശാസ്ത്രി ഇന്ത്യന്‍ ടീം പരിശീലക സ്ഥാനത്ത് നിന്നും  ഒഴിയണമെന്ന് മുന്‍ ഇന്ത്യന്‍ താരം

ravi sasthri

ഇംഗ്ലണ്ടിനെതിരായ പരമ്പരയിലെ വന്‍ പരാജയത്തിന് ശേഷം വിമര്‍ശകരുടെ പ്രധാന ഇരയായി മാറുകയാണ് മുഖ്യ പരിശീലകന്‍ രവി ശാസ്ത്രി. ആരാധകര്‍ മുതല്‍ താരങ്ങള്‍ വരെ രവി ശാസ്ത്രിയെ വിമര്‍ശിക്കുകയാണ്. ആസ്‌ത്രേലിയന്‍ പര്യടനത്തിന് മുന്‍പ് തന്നെ രവി ശാസ്ത്രിയെ പരിശീലക സ്ഥാനത്ത് നിന്ന് മാറ്റണമെന്ന് ആവശ്യപ്പെട്ട് മുന്‍ ഇന്ത്യന്‍ താരം ചേതന്‍ ചൌഹാനും രംഗത്തെത്തി. സൌരവ് ഗാംഗുലി, വിരേന്ദര്‍ സെവാഗ് എന്നിവരെത്തുടര്‍ന്ന് ചേതനും ശാസ്ത്രിയുടെ രാജി ആവശ്യപ്പെട്ടതോടെ ടീം അധികൃതര്‍ ആശങ്കയിലായിരിക്കുകയാണ്. ഇന്ത്യയും ഇംഗ്ലണ്ടും സമശക്തികളായിട്ടും ഇന്ത്യക്ക് ഇംഗ്ലണ്ടിന്റെ വാലറ്റക്കാരെപ്പോലും നിരാശപ്പെടുത്താനായില്ലെന്ന് ചേതന്‍ പറഞ്ഞു. 1980 ല്‍ ഇന്ത്യ ലോകത്തിലെ ഏറ്റവും നല്ല സന്ദര്‍ശക രാജ്യമായിരുന്നെന്ന് പറഞ്ഞ ചേതന്‍, വിരാട് കൊഹ്‌ലി നയിക്കുന്ന ടീം ഇന്ത്യയെ വിമര്‍ശിച്ചു. മൂന്നാം ടെസ്റ്റിലെ വിജയത്തിന് ശേഷം വിരാട് കൊഹ്‌ലി നയിക്കുന്ന ടീം ഇന്ത്യ ലോകത്തിലെ ഏറ്റവും നല്ല സന്ദര്‍ശക രാജ്യമാണെന്ന് രവി ശാസ്ത്രി പറഞ്ഞിരുന്നു.ഏഷ്യന്‍ കപ്പില്‍ ടീമിന് വിജയപ്രതീക്ഷകളുണ്ടെന്നും ടീം സന്തുലിതമാണെന്നും അദ്ദേഹം പറഞ്ഞു. ചേതന്‍ ചൌഹാന്‍ 1961 മുതല്‍ 1981 വരെ ഇന്ത്യക്കായി 40 ടെസ്റ്റ് മത്സരങ്ങളില്‍ നിന്നും 2048 റണ്‍സ് നേടിയിട്ടുണ്ട്.

ചെലവ് ചുരുക്കാന്‍ 70 ആഡംബര കാറുകള്‍ ലേലം ചെയ്ത് ഇമ്രാന്‍ സര്‍ക്കാര്‍

ഇസ്ലാമാബാദ്: ചെലവു ചുരുക്കലിന്റെ ഭാഗമായി പാക്കിസ്ഥാനില്‍ സര്‍ക്കാര്‍ ഉടമസ്ഥതയിലുള്ള ആഡംബര കാറുകള്‍ ലേലത്തില്‍ വിറ്റു. ലേലത്തിനായി വച്ച 102 വാഹനങ്ങളില്‍ ബുള്ളറ്റ് പ്രൂഫ് കാറുകളടക്കം 70 എണ്ണമാണ് വിറ്റുപോയത്. സര്‍ക്കാരിന്റെ ചെലവ് ചുരുക്കല്‍ പദ്ധതികളുടെ ഭാഗമായാണ് ആഡംബര വാഹനങ്ങള്‍ ഒഴിവാക്കാന്‍ ഇമ്രാന്‍ ഖാന്‍ സര്‍ക്കാരിന്റെ തീരുമാനം.
മുന്‍ പ്രധാനമന്ത്രി നവാസ് ഷരീഫ് മന്ത്രിമന്തിരത്തില്‍ വളര്‍ത്തിയിരുന്ന എട്ട് എരുമകളെയും വില്‍ക്കാന്‍ തീരുമാനമായിട്ടുണ്ട്. ഇതിനു പുറമേ മന്ത്രിമാര്‍ക്കായി വാങ്ങിയ നാല് ഹെലികോപ്റ്ററുകളും വില്‍ക്കുമെന്നും സര്‍ക്കാര്‍ വൃത്തങ്ങള്‍ അറിയിച്ചു. പാക് സര്‍ക്കാരിന് നിലവില്‍ 30 ലക്ഷം കോടി രൂപയുടെ ബാധ്യതയുള്ളതായാണ് റിപ്പോര്‍ട്ട്.

കണ്ണൂര്‍ സര്‍വ്വകലാശാലയുടെ നിലവാരമുയര്‍ത്തുന്നു കിഫ്ബിയില്‍ നിന്നും പണം ലഭ്യമാക്കും

കണ്ണൂര്‍: കണ്ണൂര്‍ സര്‍വ്വകലാശാലയില്‍ ആവശ്യമായ ഭൗതികസാഹചര്യവും ജീവനക്കാരുടെ കുറവും ഈ അധ്യയനവര്‍ഷം തന്നെ പരിഹരിക്കുന്നതിന് ആവശ്യമായ നടപടി സര്‍ക്കാര്‍ സ്വീകരിക്കുമെന്ന് ഉന്നത വിദ്യാഭ്യാസമന്ത്രി കെ.ടി ജലീല്‍ ഉറപ്പുനല്‍കി. കണ്ണൂര്‍ സര്‍വ്വകലാശാലാ സിന്‍ഡിക്കേറ്റ് അംഗങ്ങളുടെ യോഗത്തിലാണ് മന്ത്രി ഇക്കാര്യം വ്യക്തമാക്കിയത്.
ഭൗതിക സാഹചര്യം ഒരുക്കുന്നതിന് 250 കോടി രൂപയുടെ പ്രൊജക്ട് തയ്യാറാക്കി സമര്‍പ്പിച്ചിരുന്നു. ഇതിനായുള്ള തുക അടുത്ത വകയിരുത്തലില്‍ കിഫ്ബി നല്‍കും. അതിനാവശ്യമായ നടപടികള്‍ അവസാന ഘട്ടത്തിലാണ്. സംസ്ഥാന സര്‍ക്കാറില്‍ നിന്ന് 170.60 കോടി രൂപയും റൂട്ടയില്‍ നിന്ന് 20 കോടി രൂപയുമടക്കം 400 കോടി രൂപയുടെ വികസന പ്രവര്‍ത്തനങ്ങളാണ് സര്‍വ്വകലാശാലയില്‍ നടത്തുക. അദ്ധ്യാപകരുടെയും അനദ്ധ്യാപക ജീവനക്കാരുടെയും കുറവ് ഉടന്‍ പരിഹരിക്കും. അതിനായി മാസ്റ്റര്‍ പ്ലാന്‍ തയ്യാറാക്കി സമര്‍പ്പിക്കുന്നിന്റെ അടിസ്ഥാനത്തിലായിരിക്കും നടപടികള്‍ സ്വീകരിക്കുക.കണ്ണൂര്‍ സര്‍വ്വകലാശാലയെ കുറിച്ച് സര്‍ക്കാറിന് ചില സ്വപ്‌നങ്ങളുണ്ട്. കാമ്പസ്സുകളില്‍ നിന്നും പുതിയ പുതിയ ആശയങ്ങളാണ് ജനങ്ങള്‍ പ്രതീക്ഷിക്കുന്നത്. അതിനാവശ്യമായ പ്രവര്‍ത്തനങ്ങളാണ് കാമ്ബസ്സിനുള്ളില്‍ നടക്കേണ്ടത്. പരീക്ഷകള്‍ നടത്തുക മാത്രമല്ല കോളജുകളുടെ ചുമതല. അതിലുപരി ആശയങ്ങള്‍ ഉല്‍പ്പാദിപ്പിക്കാനുള്ള ശ്രമവും വേണം. എങ്കില്‍കണ്ണൂര്‍ സര്‍വ്വകലാശാലയെ അന്തര്‍ദേശീയ തലത്തില്‍ വളര്‍ത്താന്‍ കഴിയുമെന്നും മന്ത്രി പറഞ്ഞു.
ഉന്നത വിദ്യാഭ്യാസ വകുപ്പിനുകീഴിലുള്ള ഒമ്പത് സര്‍വകലാശാലയെയും മികവിന്റെ കേന്ദ്രങ്ങളാക്കി ദേശീയ റാങ്കിംഗ് ഉയര്‍ത്തുന്നതിനുള്ള കര്‍മപദ്ധതികള്‍ക്ക് തുടക്കമിടാനാണ് മന്ത്രി ഇന്നലെ തിരുവനന്തപുരത്ത് സിന്‍ഡിക്കേറ്റ് അംഗങ്ങളുടെ യോഗം വിളിച്ചുചേര്‍ത്തത്. സര്‍വകലാശാലകളുടെ പ്രൊ. ചാന്‍സലര്‍ കൂടിയായ മന്ത്രി ഓരോ സര്‍വകലാശാലകളിലെയും സിന്‍ഡിക്കറ്റ് അംഗങ്ങളെ പ്രത്യേകമായാണ് കണ്ടത്. ഓരോ മണിക്കൂര്‍ ഇടവിട്ടാണ് കണ്ണൂര്‍, കാലിക്കറ്റ്, എംജി, കേരള സര്‍വകലാശാലകളുടെ സിന്‍ഡിക്കറ്റ് അംഗങ്ങളുമായി കൂടിക്കാഴ്ച നടത്തിയത്.
സര്‍വകലാശാലകളിലെ ബിരുദ, ബിരുദാനന്തര പരീക്ഷാ നടത്തിപ്പ് സമഗ്രമായി പരിഷ്‌കരിക്കാനും മൂല്യനിര്‍ണയവും ഫലപ്രഖ്യാപനവും സമയബന്ധിതവും ഏകീകൃതവുമാക്കാനുള്ള നടപടികളും യോഗം ചര്‍ച്ച ചെയ്തു. ഗവേഷണ മേഖലയുടെ നവീകരണമടക്കം ഉന്നത വിദ്യാഭ്യാസരംഗത്തെ മുഴുവന്‍ പ്രശ്‌നങ്ങളും ചര്‍ച്ചയ്ക്കുവന്നിരുന്നു. സിന്‍ഡിക്കറ്റ് അംഗങ്ങളുടെ യോഗ ശേഷം 25, 26 തീയതികളില്‍ സര്‍വകലാശാലകളിലെ അധ്യാപക, വിദ്യാര്‍ഥി, ജീവനക്കാര്‍ എന്നിവരുടെ സംഘടനാ പ്രതിനിധികളുമായി ചര്‍ച്ച നടത്തും. 26ന് രജിസ്ട്രാര്‍മാരുടെയും 27ന് വൈസ് ചാന്‍സലര്‍മാരുടെയും യോഗം വിളിച്ചിട്ടുണ്ട്.

കരുണാകരന്റെ രാജിയുടെ കാരണങ്ങളിലേക്ക് പോകാന്‍ ആഗ്രഹിക്കുന്നില്ല: ഹസന്‍

തിരുവനന്തപുരം: കെ.കരുണാകരന്‍ മുഖ്യമന്ത്രി സ്ഥാനത്ത് നിന്ന് രാജിവയ്ക്കാനിടയായ കാരണങ്ങളിലേക്ക് പോകാന്‍ താന്‍ ആഗ്രഹിക്കുന്നില്ലെന്ന് കെ.പി.സി.സി പ്രസിഡന്റ് എം.എം. ഹസന്‍ പറഞ്ഞു. എ.ഐ.സി.സി പറഞ്ഞിട്ട് അദ്ദേഹം രാജി വച്ചു. ചാരക്കേസുമായി അതിനൊന്നും ബന്ധമില്ലെന്നതാണ് വസ്തുതയെന്നും പ്രസ് ക്ലബ്ബിന്റെ മുഖാമുഖം പരിപാടിയില്‍ ഹസന്‍ പറഞ്ഞു.
നരസിംഹ റാവുവാണ് കരുണാകരനെ ചതിച്ചത് എന്ന കെ.മുരളീധരന്‍ പറഞ്ഞതിനെപ്പറ്റി, ആരാണ് ചതിച്ചത് എന്ന് പാര്‍ട്ടി ചര്‍ച്ച നടത്തിയിട്ടില്ല എന്നായിരുന്നു ഹസന്റെ മറുപടി. മുരളീധരന്‍ പറഞ്ഞതിനെപ്പറ്റി അദ്ദേഹത്തോടാണ് ചോദിക്കേണ്ടത്. അതൊരു പൊതുചര്‍ച്ചയാക്കാനില്ല. മുരളീധരന്‍ കെ.പി.സി.സി യോഗത്തില്‍ പറഞ്ഞാല്‍ മറുപടി പറയാം. ഇപ്പോള്‍ ഇതേപ്പറ്റിയൊരു ചര്‍ച്ചയ്ക്ക് പ്രസക്തിയില്ല. ആ രണ്ട്‌പേരും നമ്മോടൊപ്പമില്ല. പത്മജ പറഞ്ഞതിനെപ്പറ്റി അവരോട് ചോദിക്കണം.
എല്ലാം ചാരം മൂടിക്കിടക്കുന്ന ചരിത്രമാണ്. അതിലെ ചാരം മാറ്റേണ്ട സാഹചര്യമില്ല. മുരളി തന്നെ പറഞ്ഞത് പോലെ ഇത്തരം വിവാദങ്ങള്‍ പാര്‍ട്ടിക്ക് ഇപ്പോള്‍ ഗുണകരമല്ല. പാര്‍ട്ടിക്ക് ആരോഗ്യമില്ലെന്നാണോ എന്ന ചോദ്യത്തിന്, പനിയോ ക്ഷീണമോ വന്നാല്‍ മൊത്തം ആരോഗ്യമില്ല എന്ന് പറയാനാവില്ലെന്നായിരുന്നു മറുപടി. കന്യാസ്ത്രീകളുടെ ധര്‍മ്മസമരത്തിന് പൂര്‍ണ്ണ പിന്തുണ നല്‍കുന്നു. കോണ്‍ഗ്രസ് വനിതാനേതാക്കള്‍ അവരെ സന്ദര്‍ശിച്ചിട്ടുണ്ട്.
രാഷ്ട്രീയപാര്‍ട്ടികള്‍ ആ സമരം ഏറ്റെടുക്കുന്ന സാഹചര്യമില്ല. അങ്ങനെയുണ്ടെങ്കില്‍ അപ്പോള്‍ നോക്കാം. ബിഷപ്പിനെ അറസ്റ്റ് ചെയ്യാത്തതിനെപ്പറ്റി ചോദിച്ചപ്പോള്‍ അത് അന്വേഷണത്തിന്റെ അടിസ്ഥാനത്തില്‍ പൊലീസ് തീരുമാനിക്കേണ്ടതാണെന്നായിരുന്നു മറുപടി.
സര്‍ക്കാര്‍ വേട്ടക്കാര്‍ക്കൊപ്പമാണെന്ന തോന്നല്‍ ഇക്കാര്യത്തില്‍ ജനങ്ങളിലുണ്ട്. മുഖ്യമന്ത്രി ചികിത്സയ്ക്ക് പോയതോടെ വിവാദങ്ങളുടെ പ്രളയമാണ്. പത്തനംതിട്ട ജില്ലയില്‍ 788 ഉദ്യോഗസ്ഥരെ ഫണ്ട്പിരിവിന് ചുമതലപ്പെടുത്തിയതോടെ അവിടെ പുനരധിവാസപ്രവര്‍ത്തനങ്ങള്‍ അവതാളത്തിലായി. പ്രളയാനന്തരമുണ്ടായ പ്രതിഭാസങ്ങളെ ദുരന്തനിവാരണ അതോറിറ്റി കാണുന്നില്ല.
ദുരിതാശ്വാസവുമായി ബന്ധപ്പെട്ട സുപ്രധാനതീരുമാനങ്ങളെടുക്കേണ്ട സമയത്താണ് രണ്ടാഴ്ചയായി മന്ത്രിസഭ ചേരാത്തത്. ഡാംസുരക്ഷാ അതോറിറ്റി വിദഗ്ധരെ വച്ച് പുന:സംഘടിപ്പിക്കണം. ഈ പോക്ക് പോയാല്‍ തുലാമഴ കനത്താല്‍ എന്ത് ചെയ്യുമെന്നും ഹസന്‍ ചോദിച്ചു.

മാധ്യമങ്ങള്‍ ജനാധിപത്യത്തിന്റെ മാര്‍ഗദര്‍ശികള്‍: തിരുവഞ്ചൂര്‍ രാധാകൃഷ്ണന്‍

കോട്ടയം: മാധ്യമങ്ങള്‍ ജനാധിപത്യത്തിന്റെ കാവല്‍ക്കാരും മാര്‍ഗദര്‍ശികളുമാണെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. ഓള്‍ ഇന്ത്യ ന്യൂസ് പേപ്പര്‍ എംപ്ലോയീസ് ഫെഡറേഷന്‍ 11ാം ദേശീയ സമ്മേളനത്തിന്റെ ഭാഗമായി സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.പൊതുസമൂഹത്തിന്റെ വിവിധ പ്രശ്‌നങ്ങള്‍ സമൂഹത്തിന്റെ മുന്നിലെത്തിച്ച് ജനപ്രതിനിധികളുടെ ശ്രദ്ധയില്‍പെടുത്തുന്നതിനും അവയ്ക്കു പരിഹാരം കണ്ടെത്തുന്നതിനും മാധ്യമങ്ങള്‍ പ്രധാനപങ്കാണ് വഹിക്കുന്നതെന്നും അദ്ദേഹം പറഞ്ഞു.
സമ്മേളനത്തില്‍ അഖിലേന്ത്യ പ്രസിഡന്റ് എസ്.ഡി. ഥാക്കൂര്‍ അധ്യക്ഷത വഹിച്ചു. കെ. സുരേഷ്‌കുറുപ്പ് എംഎല്‍എ മുഖ്യപ്രഭാഷണം നടത്തി. കോട്ടയം ജില്ലാ പഞ്ചായത്ത് പ്രസിഡന്റ് സണ്ണി പാന്പാടി, എഐഎന്‍ഇഫ് ജനറല്‍ സെക്രട്ടറി വി. ബാലഗോപാല്‍, കെഎന്‍ഇഎഫ് സംസ്ഥാന പ്രസിഡന്റ് എം.സി. ശിവകുമാരന്‍ നായര്‍, ജനറല്‍ സെക്രട്ടറി സി. മോഹനന്‍, വര്‍ക്കിംഗ് ചെയര്‍മാന്‍ ഗോപന്‍ നന്പാട്ട്, ജനറല്‍ കണ്‍വീനര്‍ ജയിംസ്‌കുട്ടി ജേക്കബ്, പ്രോഗ്രാം കണ്‍വീനര്‍ ജയ്‌സണ്‍ മാത്യു എന്നിവര്‍ പ്രസംഗിച്ചു.
വൈകുന്നേരം തിരുനക്കര മൈതാനിയില്‍ നിന്നും സിഎസ്‌ഐ റിട്രീറ്റ് സെന്ററിലേക്ക് ആരംഭിച്ച ബൈക്ക് റാലി കെഎന്‍ഇഎഫ് കോട്ടയം ജില്ലാ സെക്രട്ടറി കോര സി. കുന്നുംപുറം ഫ്‌ളാഗ് ഓഫ് ചെയ്തു. കെഎന്‍ഇഎഫ് സെക്രട്ടറി റോബിന്‍ ജോസഫ്, വൈസ് പ്രസിഡന്റ് ബിജു ആര്‍, ഡി. ജയകുമാര്‍ എന്നിവര്‍ റാലിക്ക് നേതൃത്വം നല്‍കി.

സ്‌കൂള്‍ കലോത്സവം ആലപ്പുഴയില്‍ തന്നെ, ആര്‍ഭാടം ഒഴിവാക്കാന്‍ തീരുമാനം

തിരുവനന്തപുരം: സംസ്ഥാന സ്‌കൂള്‍ കലോത്സവം ആലപ്പുഴയില്‍ ഡിസംബറില്‍ തന്നെ നടക്കും. പരമാവധി ആര്‍ഭാടം ഒഴിവാക്കി കലോത്സവം നടത്താന്‍ തീരുമാനിച്ചതായി വിദ്യാഭ്യാസ മന്ത്രി പ്രൊഫ. സി രവീന്ദ്രനാഥ് അറിയിച്ചു.
കായികമേള ഒക്ടോബറില്‍ തിരുവനന്തപുരത്തും, ശാസ്‌ത്രോത്സവം നവംബറില്‍ കണ്ണൂരിലും നടക്കും. എല്ലാ മേളകള്‍ക്കും ഉദ്ഘാടന സമാപന സമ്മേളനങ്ങള്‍ ഉണ്ടായിരിക്കില്ലെന്നും അദ്ദേഹം കൂട്ടിച്ചേര്‍ത്തു. പ്രളയത്തിന്റെ പശ്ചാത്തലത്തില്‍ സംസ്ഥാന സ്‌കൂള്‍ ശാസ്ത്ര, കായിക, കലാ മേളകള്‍ ഒഴിവാക്കാന്‍ നേരത്തെ തീരുമാനിച്ചിരുന്നെങ്കിലും പിന്നീട് റദ്ദാക്കുകയായിരുന്നു.
ആര്‍ഭാടങ്ങള്‍ ഒഴിവാക്കുമെങ്കിലും വിദ്യാര്‍ത്ഥികള്‍ക്ക് ഒരു തരത്തിലുള്ള ബുദ്ധിമുട്ടും ഉണ്ടാകില്ലെന്നും അവര്‍ക്ക് തങ്ങളുടെ സര്‍ഗാത്മക കഴിവുകള്‍ പ്രകടിപ്പിക്കാനുള്ള എല്ലാ അവസരവും നല്‍കുമെന്നും മന്ത്രി പറഞ്ഞു. മേളകളില്‍ ഭക്ഷണം കുടുംബശ്രീ വഴി നല്‍കും.
ഗ്രേസ് മാര്‍ക്കിന് നിലവിലെ മാനദണ്ഡം ഉപയോഗിക്കും. മത്സരം രാത്രിയിലേക്ക് നീളുന്നത് ഒഴിവാക്കും. എല്‍പി, യുപി വിഭാഗത്തില്‍ സ്‌കൂള്‍ തലത്തില്‍ വരെ മത്സരങ്ങള്‍ നടത്തും. ഓണറേറിയം ഒഴിവാക്കണമെന്നു കായിക അദ്ധ്യാപകര്‍ സര്‍ക്കാരിനോട് ആവശ്യപ്പെട്ടതു പരിഗണിക്കുമെന്നും മന്ത്രി പറഞ്ഞു.
പ്രളയത്തിന്റെ പശ്ചാത്തലത്തില്‍ ഒരു വര്‍ഷത്തേക്ക് സര്‍ക്കാര്‍ എല്ലാവിധ ആഘോഷങ്ങളും ഒഴിവാക്കാനാണ് മുമ്പ് തീരുമാനിച്ചിരുന്നത്. സ്‌കൂള്‍, സര്‍വകലാശാലാ കലോത്സവങ്ങള്‍, അന്താരാഷ്ട്ര ചലച്ചിത്രമേള, വിനോദസഞ്ചാര വകുപ്പിന്റേതടക്കം എല്ലാ വകുപ്പുകളുടെയും ആഘോഷങ്ങള്‍ എന്നിവ ഇതിലുള്‍പ്പെടും. ഈ മേളകള്‍ക്കായി നിശ്ചയിച്ച തുക മുഖ്യമന്ത്രിയുടെ ദുരിതാശ്വാസനിധിയിലേക്ക് നല്‍കണമെന്നായിരുന്നു തീരുമാനം. ആഘോഷങ്ങള്‍ മാറ്റിവയ്ക്കുന്നതിനെതിരേ മന്ത്രിമാരുടെ ഇടയില്‍ത്തന്നെ ശക്തമായ എതിര്‍പ്പുയര്‍ന്നിരുന്നു. ഈ സാഹചര്യത്തിവാണ് കലോത്സവം നടത്താന്‍ തീരുമാനിച്ചത്.

ദിലീപിന് വിദേശത്ത് പോകാന്‍ അനുമതി

കൊച്ചി: നടിയെ ആക്രമിച്ച കേസിലെ പ്രതിയായ നടന്‍ ദിലീപിന് വിദേശത്ത് പോകാന്‍ എറണാകുളം അഡിഷണല്‍ സെഷന്‍സ് കോടതിയാണ് അനുമതി നല്‍കി. ഈ മാസം 20 മുതല്‍ 22 വരെ ഖത്തറില്‍ പോകുന്നതിനാണ് കോടതി അനുമതി നല്‍കിയത്.എന്നാല്‍, കേസുമായി ബന്ധപ്പെട്ട് ദിലീപ് ആവശ്യപ്പെട്ട 35 രേഖകളില്‍ ഏഴ് രേഖകള്‍ കൈമാറാനാകില്ലെന്ന് പൊലീസ് കോടതിയെ അറിയിച്ചു. ഇവ നല്‍കുന്നത് നടിയുടെ സുരക്ഷയെ ബാധിക്കുമെന്ന വാദം ഉയര്‍ത്തിയാണ് ദിലീപിന്റെ ആവശ്യത്തെ പൊലീസ് എതിര്‍ത്തത്. കേസ് അടുത്ത മാസം എട്ടിന് വീണ്ടും പരിഗണിക്കും. അന്നായിരിക്കും കേസിന്റെ വിചാരണ നടപടി ഉള്‍പ്പെടെയുള്ള കാര്യങ്ങള്‍ കൂടി തീരുമാനിക്കുക. അതേസമയം ആക്രമണത്തിനിരയായ നടി വിചാരണ നടപടികള്‍ക്ക് വനിതാജഡ്ജി അദ്ധ്യക്ഷയായ കോടതി വേണമെന്ന് ആവശ്യപ്പെട്ട് നല്‍കിയ ഹര്‍ജി ഹൈക്കോടതിയുടെ പരിഗണനയിലുണ്ട്.

ക്യാപ്റ്റന്‍ രാജു  അന്തരിച്ചു

captain-raju.jpg.image.784.410

കൊച്ചി: ചലച്ചിത്ര നടനും സംവിധായകനുമായ ക്യാപ്റ്റന്‍ രാജു(68) അന്തരിച്ചു. കൊച്ചിയിലെ വസതിയിലാണ് അന്ത്യം. മസ്തിഷ്‌കാഘാതത്തെ തുടര്‍ന്ന് ചികിത്സയിലായിരുന്നു. സംസ്‌കാരം പിന്നീട്.
വില്ലനായും സ്വഭാവ നടനായും പ്രേക്ഷക ശ്രദ്ധ പിടിച്ചുപറ്റിയ നടനാണ് അദ്ദേഹം. മലയാളത്തിനു പുറമേ ഹിന്ദി, തമിഴ്, കന്നഡ ഭാഷകളിലും അഭിനയിച്ചു. 1981ല്‍ പുറത്തിറങ്ങിയ ‘രക്തം’ ആണ് ആദ്യ ചിത്രം. വടക്കന്‍വീരഗാഥ, രതിലയം, ആവനാഴി, ഓഗസ്റ്റ് ഒന്ന്, നാടോടിക്കാറ്റ്, കാബൂളിവാല, സിഐഡി മൂസ, പഴശ്ശിരാജ, മുംബൈ പോലീസ് തുടങ്ങി അഞ്ഞൂറിലേറെ ചിത്രങ്ങളില്‍ അദ്ദേഹം വേഷമിട്ടു. 2017 ല്‍ പുറത്തിറങ്ങിയ ‘മാസ്റ്റര്‍പീസ്’ ആണ് അവസാന ചിത്രം.
1950 ജൂണ്‍ 27ന് പത്തനംതിട്ടയിലെ ഓമല്ലൂരില്‍ കെ.ജി. ഡാനിയേലിന്റെയും അന്നമ്മയുടെയും മകനായി ജനിച്ചു. ഓമല്ലൂര്‍ ഗവ: യു.പി. സ്‌കൂളിലും എന്‍എസ്എസ് ഇംഗ്ലീഷ് മീഡിയം സ്‌കൂളിലുമായി പ്രാഥമിക വിദ്യാഭ്യാസം പൂര്‍ത്തിയാക്കി. പത്തനംതിട്ട കാത്തോലിക്കേറ്റ് കോളജില്‍ നിന്ന് ബിരുദം നേടിയ അദ്ദേഹം 21–ാം വയസില്‍ ഇന്ത്യന്‍ സൈന്യത്തില്‍ കമ്മിഷന്‍ഡ് ഓഫിസറായി ജോലിയില്‍ പ്രവേശിച്ചു. സൈന്യത്തില്‍നിന്നു വിരമിച്ച ശേഷമാണ് രാജു ചലച്ചിത്രരംഗത്തേക്കു കടന്നത്.
അഭിനയത്തിനൊപ്പം സംവിധാന മോഹവും മുറകെപിടിച്ച ക്യാപ്റ്റന്‍ രണ്ടു ചിത്രങ്ങള്‍ സംവിധാനം ചെയ്തു. 1997ല്‍ ഇതാ ഒരു സ്‌നേഹഗാഥ എന്ന ചിത്രത്തിലൂടെ അദ്ദേഹം സംവിധായകനായി അരങ്ങേറി. പിന്നീട് 2012ല്‍ മിസ്റ്റര്‍ പവനായി എന്ന ചിത്രവും അദ്ദേഹം സംവിധാനം ചെയ്തു.
കഴിഞ്ഞ ജൂലൈയില്‍ മസ്തിഷ്‌കാഘാതത്തെ തുടര്‍ന്ന് ഒമാനില്‍ ചികിത്സയിലായിരുന്നു. പിന്നീട് കൊച്ചിയിലെ വസതിയിലേക്ക് മടങ്ങിവന്നു.
കൊച്ചിയില്‍ നിന്നു ന്യൂയോര്‍ക്കിലേക്കുള്ള യാത്രയ്ക്കിടെ മസ്തിഷ്‌കാഘാതം ഉണ്ടായതിനെത്തുടര്‍ന്നു വിമാനമിറക്കിയാണു ക്യാപ്റ്റന്‍ രാജുവിനെ ആശുപത്രിയില്‍ പ്രവേശിപ്പിച്ചത്. പ്രമീളയാണ് ഭാര്യ. മകന്‍: രവി.