നഞ്ചമ്മയുടെ പാട്ട് കേള്‍ക്കുമ്പോള്‍ ഓര്‍മ വരുന്നത് അഭിമന്യുവിന്റെ അമ്മയെ: സുരേഷ് ഗോപി


'അയ്യപ്പനും കോശിയും' എന്ന ചിത്രത്തിലെ ഗാനത്തിലൂടെ കേരളക്കരയാകെ ഏറ്റെടുത്ത ഗായികയാണ് അട്ടപ്പാടി സ്വദേശി നഞ്ചമ്മ. ചിത്രത്തിന്റെ റിലീസിനു മുന്‍പെ പാട്ട് വന്‍ ഹിറ്റായി മാറിയിരുന്നു. ഈ പാട്ട് കേള്‍ക്കുമ്പോള്‍ കാണാന്‍ കഴിഞ്ഞത് ഒരു അമ്മയെയാണെന്ന് നടന്‍ സുരേഷ് ഗോപി പറഞ്ഞു. സുരേഷ് ഗോപി തന്നെ അവതാരകനായെത്തിയ ഷോയിലാണ് ഇക്കാര്യം പറഞ്ഞത്.നഞ്ചമ്മ ആലപിച്ച 'ദൈവമകളേ...' എന്ന ഗാനം കേള്‍ക്കു്‌മ്പോള്‍ തനിക്ക് അഭിമന്യുവിന്റെ അമ്മയുടെ മുഖമാണ് ഓര്‍മ വരുമെന്ന് അദ്ദേഹം പറഞ്ഞു. നഞ്ചിയമ്മയുടെ പാട്ടിലൂടെ പ്രേക്ഷകരുടെയും സുരേഷ് ഗോപിയുടെയും കണ്ണ് നിറയുകയായിരുന്നു. 'നാന്‍ പെറ്റ മകനെ' എന്ന് വിളിക്കുന്ന അഭിമന്യുവിന്റെ അമ്മയെ ഓര്‍ത്ത് പോകും. ആ അമ്മയുടെ മുഖവും, ആ ഗ്രാമവും ഒരു നിമിഷം മനസിലൂടെ പോകും. അഭിമന്യുവിന്റെ അമ്മയ്ക്കും കുടുംബത്തിനും ഓരായിരം പ്രാര്‍ഥനകള്‍ നേരുന്നതായും സുരേഷ് ഗോപി വേദിയില്‍ വച്ചു പറഞ്ഞു.വിതുമ്പലോടെയാണ് നഞ്ചമ്മ വേദിയില്‍ പാട്ട് അവസാനിപ്പിച്ചത്. പാടിക്കഴിഞ്ഞപ്പോള്‍ സുരേഷ് ഗോപി നഞ്ചമ്മയുടെ കാല്‍ തൊട്ട് വന്ദിച്ചു. 2018ല്‍ എറണാകുളം മഹാരാജാസ് കോളജില്‍ രാഷ്ട്രീയ സംഘര്‍ഷത്തില്‍ കൊല്ലപ്പെട്ട അഭിമന്യുവിന്റെ മൃതദേഹം കെട്ടിപ്പിടിച്ച് 'നാന്‍ പെറ്റ മകനേ' എന്നു ഹൃദയം നൊന്തു കരഞ്ഞ ആ അമ്മയെ ആരും മറക്കാനിടയില്ല.

ഒരു അഭിപ്രായം പോസ്റ്റ് ചെയ്യൂ

0 അഭിപ്രായങ്ങള്‍