കേരള രാഷ്ട്രീയത്തില്‍ മറക്കാനാവാത്ത സംഭാവനകള്‍ നല്‍കിയ വ്യക്തിത്വം: കെ.എം മാണിയുടെ വീട് സന്ദര്‍ശിച്ച് രാഹുല്‍ ഗാന്ധി

കോട്ടയം: അന്തരിച്ച കേരള കോണ്‍ഗ്രസ് എം.ചെയര്‍മാന്‍ കെ.എം മാണിയുടെ വീട് സന്ദര്‍ശിച്ച് കോണ്‍ഗ്രസ് അദ്ധ്യക്ഷന്‍ രാഹുല്‍ ഗാന്ധി. പത്തനംതിട്ടയിലെ പ്രചാരണ പരിപാടിക്ക് ശേഷമാണ് രാഹുല്‍ ഗാന്ധി പാലായിലെ കരിങ്ങോഴയ്ക്കല്‍ തറവാട്ടിലെത്തിയത്. കുടുംബാംഗങ്ങളെ നേരിട്ട് അനുശോചനം അറിയിച്ചു. കേരളരാഷ്ട്രീയത്തില്‍ കെ.എം മാണി നല്‍കിയ സംഭാവനകള്‍ മറക്കാനാവാത്തതാണെന്ന് രാഹുല്‍ പറഞ്ഞു. മാണിയുടെ മരണവാര്‍ത്തയറിഞ്ഞ് രാഹുല്‍ ഗാന്ധി ജോസ്.കെ.മാണിയെ ഫോണില്‍ വിളിച്ച് അനുശോചനം അറിയിച്ചിരുന്നു.
എ.ഐ.സി.സി ജനറല്‍ സെക്രട്ടറി മുകുള്‍ വാസ്‌നിക് രാഹുലിന് വേണ്ടി പുഷ്പചക്രം സമര്‍പ്പിച്ചിരുന്നു. ഇതിന് പിന്നാലെയാണ് കുടുംബാംഗങ്ങളെ നേരിട്ട് ആശ്വസിപ്പിക്കാന്‍ രാഹുല്‍ പാലായില്‍ എത്തിയത്. കെ.സി വേണുഗോപാല്‍ എം.പി, പ്രതിപക്ഷ നേതാവ് രമേശ് ചെന്നിത്തല, കോണ്‍ഗ്രസ് പ്രവര്‍ത്തക സമിതി അംഗം ഉമ്മന്‍ചാണ്ടി, മുകുള്‍ വാസ്‌നിക് അടക്കമുള്ള കോണ്‍ഗ്രസ് നേതാക്കള്‍ രാഹുലിനൊപ്പമുണ്ടായിരുന്നു.


ഒരു അഭിപ്രായം പോസ്റ്റ് ചെയ്യൂ

0 അഭിപ്രായങ്ങള്‍