സൗദി ടൂ കരിപ്പൂര്‍; ടിക്കറ്റ് ബുക്കിങ് ആരംഭിച്ചു

കരിപ്പൂര്‍ : സൗദിയില്‍ നിന്നും കരിപ്പൂരിലേക്ക് സര്‍വീസ് നടത്താനൊരുങ്ങുന്ന സൗദി എയര്‍ലൈന്‍സ്, വിമാന ടിക്കറ്റ് ബുക്കിങ് ആരംഭിച്ചു. ട്രാവല്‍സുകള്‍ മുഖേനയും ഓണ്‍ലൈനായും ടിക്കറ്റുകള്‍ ബുക്ക് ചെയ്യാം. അടുത്ത മാസം അഞ്ചിന് ജിദ്ദയില്‍ നിന്നാണ് ആദ്യ സര്‍വീസ്. ട്രാവല്‍സുകള്‍ മുഖേനയും സൗദി എയര്‍ലൈന്‍സ് വെബ്‌സൈറ്റിലും സീറ്റുകള്‍ ലഭ്യമാണ്. ആദ്യ ദിനങ്ങളിലെ യാത്രക്കായി സീറ്റുകള്‍ ബുക്ക് ചെയ്യുന്ന തിരക്കിലാണ് മലബാറിലെ പ്രവാസികള്‍. എന്നാല്‍ ടിക്കറ്റ് നിരക്ക് ഇപ്പോള്‍ വളരെ കൂടുതലാണെന്നത് പലരെയും വിഷമിപ്പിക്കുന്നു. നേരത്തെ കൊച്ചിയിലേക്ക് ടിക്കറ്റ് എടുത്ത യാത്രക്കാര്‍ക്ക് യാത്ര കോഴിക്കോട്ടേക്ക് മാറ്റാനുള്ള അവസരം സൗദി എയര്‍ലൈന്‍സ് നല്‍കുന്നുണ്ട്. അതുകൊണ്ടു തന്നെ സര്‍വീസ് ആരംഭിക്കുന്ന ആദ്യ ദിനങ്ങളില്‍ വളരെ കുറഞ്ഞ സീറ്റുകള്‍ മാത്രമേ പുതുതായി ലഭ്യമാവുകയുള്ളു. ഇതാണ് തുടക്കത്തില്‍ ടിക്കറ്റ് നിരക്ക് കൂടാന്‍ കാരണമെന്നാണ് സൂചന. കൊച്ചിയിലേക്കുള്ള അതേ ടിക്കറ്റു നിരക്കില്‍ തന്നെയായിരിക്കും കോഴിക്കോട്ടേക്കുമുള്ള നിരക്കെന്ന് എയര്‍ലൈന്‍സ് അധികൃതര്‍ വ്യക്തമാക്കിയിട്ടുണ്ട്. ഡിസംബര്‍ 5ന് ജിദ്ദയില്‍ നിന്നാണ് ആദ്യ വിമാനം. റിയാദില്‍ നിന്നുള്ള ആദ്യ വിമാനം ഡിസംബര്‍ 7നുമായിരിക്കും. കരിപ്പൂരില്‍ നിന്നും ജിദ്ദയിലേക്കു നേരിട്ടുള്ള വിമാനസര്‍വീസ് പ്രവാസികള്‍ക്കെന്ന പോലെ ലക്ഷക്കണക്കിന് ഹജ്ജ് ഉംറ തീര്ഥാടകര്‍ക്കും വലിയ അനുഗ്രഹമായിരിക്കുകയാണ്.

ഒരു അഭിപ്രായം പോസ്റ്റ് ചെയ്യൂ

0 അഭിപ്രായങ്ങള്‍